Foto: caliber.az
Resei küşterı Kievtegı Dnepr özenı arqyly ötetın Soltüstık köpırge jaŋa soqqy jasady. Būl turaly Kiev qalasynyŋ merı Vitalii Klichko mälımdedı, dep habarlaidy "Adyrna".
«Soltüstık köpırdıŋ jol jabynyna soqqy tidı. Tötenşe jaǧdailar qyzmetterı oqiǧa ornyna bara jatyr», – dedı Klichko.
Jergılıktı aqparat arnalary soqqy sätı men onyŋ saldaryn körsetetın beinejazbalar jariialady.
3 qazanda Resei äskerınıŋ Ukrainaǧa jasaǧan soqqylary saldarynan Kievtegı Soltüstık köpır zaqymdandy. Harkov oblysynda bes adam qaza tapsa, Odessa oblysynda Liberiia tuy astynda jüzgen azamattyq jük kemesıne soqqy jasaldy.
Ukrainanyŋ UNİAN agenttıgınıŋ mälımetınşe, Kievtegı köpırge jasalǧan soqqydan jol jabyny men trolleibus bailanys jelısı zaqymdanǧan. Sol jaǧalaudan oŋ jaǧalauǧa qarai qozǧalys uaqytşa toqtatyldy.
Kiev merı Vitalii Klichko soqqy saldarynan ekı adamnyŋ zardap şekkenın habarlady. Olardyŋ bırıne medisinalyq kömek oqiǧa ornynda körsetılse, ekınşısı auruhanaǧa jetkızıldı. Keiın ol ambulatoriialyq em aluǧa auystyrylǧan.
Resei küşterı Harkov qalasyna da basqarylatyn aviasiialyq bombalarmen soqqy jasaǧan. Şabuyldan zardap şekkender sany 42 adamǧa jettı. Olardyŋ arasynda üş bala bar.
Qaza tapqandar arasynda 66 jäne 80 jastaǧy ekı äiel bolǧan.
Jalpy, bır täulık ışınde Harkov oblysynda Reseidıŋ soqqylarynan bes adam qaza tauyp, 49 adam jaralanǧan.
Odessa oblysynda jük kemesı zaqymdandy
Sonymen qatar Resei äskerınıŋ soqqysyna Odessa oblysyndaǧy porttardyŋ bırınde tūrǧan Liberiia tuy astyndaǧy azamattyq jük kemesı ūşyraǧan.
Ukraina teŋız porttary äkımşılıgınıŋ mälımetınşe, şabuyl saldarynan keme mehanigı qaza tauyp, ekipajdyŋ taǧy üş müşesı jaralanǧan.
Kemedegı 13 ekipaj müşesı qauıpsız jerge evakuasiialandy.
