Bügın, 5 qaraşada prezident Qasym-Jomart Toqaev «Qazaqstan Respublikasy ışkı saiasatynyŋ negızgı qaǧidattary, qūndylyqtary men baǧyttaryn bekıtu turaly» Jarlyqqa qol qoidy, dep habarlaidy «Adyrna» tılşısı.
Ūlttyq qūryltaidyŋ IV otyrysynda sarapşylar men qoǧam qairatkerlerı ışkı saiasat salasynda jürgızılıp jatqan barlyq jūmysty retteitın bıryŋǧai tūjyrymdamalyq qūjat äzırleudı ūsynǧan edı. Prezident būl ideiany qoldap, onyŋ memlekettık qūrylymdar jūmysyn jüielendıruge baǧyttaluy kerek ekenın atap ötken.
Prezident Äkımşılıgı men müddelı memlekettık organdar Memleket basşysynyŋ jyl saiynǧy Joldaularyn, söilegen sözderın, Qazaqstan Respublikasynyŋ 2029 jylǧa deiıngı ūlttyq damu josparyn negızge ala otyryp, «Işkı saiasattyŋ negızgı qaǧidattary, qūndylyqtary men baǧyttary» qūjatyn daiyndady.
Tūjyrymdamalyq qūjatty äzırleuge Ūlttyq qūryltaidyŋ müşelerı, sarapşylar, ǧylymi jäne qoǧamdyq ūiymdardyŋ ökılderı belsene atsalysty.
Atalǧan qūjat bırınşı kezekte memlekettık organdarǧa arnalǧan. Onyŋ basty maqsaty – ışkı saiasat salasyndaǧy jūmysty jüieleu ärı üilestıru.
Onda «Zaŋ jäne tärtıp», «Halyq ünıne qūlaq asatyn memleket», «Türlı közqaras – bırtūtas ūlt», «Küştı Prezident – yqpaldy Parlament – esep beretın Ükımet», «Adal azamat», «Taza Qazaqstan» sekıldı ışkı saiasat qaǧidattary qamtylǧan.
Sondai-aq Ūlttyq qūryltai otyrystarynda köterılgen jalpyūlttyq qūndylyqtardyŋ tızbesı engızıldı. Jalpyūlttyq bıregeilıktı tanytatyn ūlttyq nyşandar jüiesı jasaldy.
Qūjatta qoǧamdyq dialog, etnosaralyq qatynas, dın, mädeni-gumanitarlyq, otbasy, jastar, aqparat sekıldı ışkı saiasattyŋ basym baǧyttary aiqyndalǧan. Qabyldanǧan tūjyrymdamalyq qūjat memlekettık organdardyŋ ışkı saiasat salasyndaǧy jūmysyn ūiymdastyruǧa negız bolady.
