Talǧar audanynda jastar arasynda toǧyzqūmalaqtan Qazaqstan Respublikasynyŋ XXIV chempionaty märesıne jettı. Bır apta boiy elımızdıŋ 15 öŋırınen kelgen 100-ge juyq üzdık sportşy Qazaqstan chempiony ataǧymen qatar, qaraşa aiynda Türkiiada ötetın älem chempionatyna berıletın joldamalar üşın baq synady.
Jarys U-19 jäne U-21 jas sanattary boiynşa halyqaralyq erejelerge säikes üş dissiplinada – klassika, rapid jäne blis türlerınde ötkızıldı. Mūndai format klassikalyq partiiada da, uaqyt şekteulı oiyndarda da joǧary nätije körsete alatyn ämbebap oiynşylardy anyqtauǧa mümkındık beredı.
Qazaqstan ūlttyq qūramasynyŋ toǧyzqūmalaqtan memlekettık jattyqtyruşysy Däulet Äbdıkärımovtıŋ aituynşa, būl chempionat jas sportşylar üşın ülken synaq boldy.
«Köptegen qatysuşylar üşın būl turnir sporttaǧy şeberlıktı şyŋdaityn maŋyzdy kezeŋge ainaldy. Mūnda teoriiany jaqsy bılu nemese oiyn tehnikasynyŋ myqty boluy jetkılıksız. Ärtürlı dissiplinalarǧa tez beiımdelıp, psihologiialyq qysymdy eŋsere alǧan sportşylar ǧana jeŋıske jetedı. Osyndai jarystarda Qazaqstan ūlttyq qūramasynyŋ bolaşaq negızgı qūramy qalyptasady», – dedı ol.
Almaty oblysynyŋ toǧyzqūmalaqtan aǧa jattyqtyruşysy Erbolat Qylyşbaev qazırgı oiynşylardyŋ batyl oiynymen jäne tyŋ şeşımder qabyldauǧa ūmtylysymen erekşelenetının atap öttı.
Rapid baǧdarlamasynyŋ U-19 sanaty boiynşa qyzdar arasynda Batys Qazaqstan oblysynyŋ ökılı Samira Orazmūhanbet chempion atandy. Ekınşı oryndy Qostanai oblysynan kelgen Aiym Älıbekqyzy, üşınşı oryndy Pavlodar oblysynan qatysqan Arujan Salmen ielendı. Al atalǧan sanat boiynşa ūldar arasynda Almaty qalasynyŋ sportşysy Meiırlan Nūrlanūly jeŋımpaz atansa, Qostanai oblysynyŋ namysyn qorǧaǧan Aidyn Jaqiev kümıs, Pavlodar oblysynan kelgen Nadir Ahmetov qola medaldy jeŋıp aldy.
U-21 sanatynda qyzdar arasynda Nūrai Mektephan (Qyzylorda oblysy) chempion atandy. Ekınşı oryn Aqbota Namazǧa (Türkıstan oblysy), üşınşı oryn Äsem Däurenbekqyzyna (Qyzylorda oblysy) būiyrdy. Ūldar arasynda Aqtöbe oblysynyŋ ökılı Qairat Tūrarbek altyn medal ielense, Almaty qalasynyŋ qatysuşysy Eldar Däken kümıs, Aqtöbe oblysynyŋ ökılı Almas Tılegenov qola jüldeger atandy.
Blis saiysynda U-19 sanatyndaǧy qyzdar bäsekesınde Abai oblysynyŋ sportşysy Aiana İsahan jeŋıske jettı. Ekınşı oryndy Samira Orazmūhanbet (Batys Qazaqstan oblysy), üşınşı oryndy Dilnaz Janat (Pavlodar oblysy) ielendı. Al ūldar arasynda Nadir Ahmetov (Pavlodar oblysy) chempion atansa, Mahmūtjan Azimhan (Astana qalasy) kümıs, Aidyn Jaqiev (Qostanai oblysy) qola medal aldy.
U-21 sanatynda qyzdar arasynda Aiana Temırbolatova (Pavlodar oblysy) bırınşı orynǧa qol jetkızdı. Aqbota Namaz (Türkıstan oblysy) kümıs, Talşyn Tarǧynbekova (Qostanai oblysy) qola jüldeger atandy. Ūldar arasynda Almaty oblysynyŋ ökılı Ernūr Batyr chempion atanyp, Eldar Däken (Almaty qalasy) ekınşı, Dias Janbau (Aqtöbe oblysy) üşınşı oryn aldy.
Klassika baǧdarlamasynda U-19 qyzdar arasynda Samira Orazmūhanbet (Batys Qazaqstan oblysy) altyn medal jeŋıp aldy. Viktoriia Beliskaia (Türkıstan oblysy) kümıs, Arujan Salmen (Pavlodar oblysy) qola jüldege ie boldy. U-19 ūldar arasynda Erdäulet Oralbai (Türkıstan oblysy) chempion atansa, Ersūltan Jalǧasbai men Aidyn Jaqiev (ekeuı de Qostanai oblysynan) jüldelı oryndardy bölıstı.
U-21 qyzdar arasynda Aqbota Namaz (Türkıstan oblysy) chempion atandy. Aiana Temırbolatova (Pavlodar oblysy) ekınşı, Nūrai Mektephan (Qyzylorda oblysy) üşınşı oryn ielendı. Ūldar arasynda Eldar Däken (Almaty qalasy) altyn medaldy jeŋıp aldy. Almaty oblysynyŋ ökılı Ernūr Batyr kümıs, Aqtöbe oblysynyŋ sportşysy Almas Tılegenov qola medalǧa ie boldy.
15-17 jas aralyǧyndaǧy mektep oquşylary arasyndaǧy alǧaşqy älem chempiony, 2025 jylǧy Aziia oiyndarynyŋ qola jüldegerı jäne Qazaqstannyŋ bırneşe dürkın chempiony bolǧan Ernūr Batyr turnirdegı bäsekelestıktıŋ öte joǧary bolǧanyn aitty.
«Är partiia erekşe zeiın qoiyp, mūqiiat boludy talap ettı. Qarsylastar öte myqty daiyndalǧandyqtan, qatelesuge jol joq ekenın sezdım. Almaty oblysynyŋ namysyn abyroimen qorǧap, el chempiony ataǧyn qaita rastaǧanyma quanyştymyn. Jattyqtyruşylaryma, komandamyzǧa jäne qoldau körsetken barşa janküierlerge alǧys aitamyn», – dedı sportşy.
Jalpykomandalyq esepte Türkıstan oblysynyŋ qūramasy chempion atandy. Ekınşı oryndy Almaty qalasynyŋ komandasy, al üşınşı oryndy Pavlodar oblysynyŋ qūramasy ielendı.
