Qarjy ministrlıgınıŋ memlekettık kırıster komitetı Nūrlan Saburovtyŋ salyq mındettemelerın oryndauyna qatysty aqparat jariialady, dep habarlaidy “Adyrna” tılşısı.
Vedomstvo mälımetınşe, Nūrlan Saburov 2023 jylǧy 21 nauryzda Qazaqstanda jeke käsıpker retınde tırkelgen. Onyŋ qyzmet türı – konserttık qyzmet.
MKK deregıne säikes, äzılkeş jeke käsıpker retınde salyq mındettemelerın 2024 jyldan berı oryndap keledı. Qazır onyŋ Qazaqstandaǧy salyq boiynşa bereşegı joq.
Komitettıŋ habarlauynşa, Nūrlan Saburovqa qatysty salyqtyq äkımşılendırudıŋ jalpy tärtıbı qoldanylady. Eger kameraldyq baqylau barysynda säikessızdıkter anyqtalsa, Salyq kodeksıne säikes tiıstı şaralar qabyldanady.
Sondai-aq MKK ūzaq uaqyt elden tys jürgen käsıpkerlerge qatysty tüsınıkteme berdı. Eger jeke käsıpkerlık qyzmetı resmi türde toqtatylmaǧan bolsa, qaita tırkeludıŋ qajetı joq, tek qajet bolǧan jaǧdaida tırkeu derekterın jaŋartu jetkılıktı. Al qyzmetı toqtatylǧan jaǧdaida käsıpkerlıktı qaita tırkeu talap etıledı.
Būǧan qosa, komitet tabys pen mülık turaly deklarasiia tapsyru tärtıbın de eske saldy. Salyq kodeksınde közdelgen talaptarǧa säikes azamattar belgılengen merzımde tiıstı deklarasiiany ūsynuǧa mındettı.
Eske salaiyq, biyl aqpanda Resei bilıgı Nūrlan Saburovtyŋ elge kıruıne 50 jylǧa tyiym salǧan.
