Qazaqstanda şılde aiynyŋ basynan bastap tauarlyq gazdyŋ ortaşa baǧasy şamamen 33%-ǧa ösedı. Būl turaly Energetika vise-ministrı Qaiyrhan Tūtqyşbaev mälımdedı, dep habarlaidy "Adyrna".
Onyŋ aituynşa, baǧanyŋ köterıluı gaz infraqūrylymyn jaŋartu jäne aldaǧy jylytu mausymyn uaqtyly ärı sapaly ötkızu üşın qajet şara bolyp tabylady.
Ministrlık ökılı tūtynuşylar üşın gaz baǧasynyŋ negızsız ösuıne jol berılmeitının atap öttı. Būl mäsele vedomstvonyŋ tūraqty baqylauynda.
«İä, alǧaşqy tört aida gaz öndıru kölemı keibır tehnikalyq aqaularǧa bailanysty tömendedı. Būl Teŋız ken ornynda jäne basqa da bırqatar ken ornynda bolǧan jaǧdailarmen bailanysty. Alaida būl tömendeu halyqty gazben qamtamasyz etuge äser etken joq. Sebebı «QazaqGaz» operatory ışkı tūtynudy tranzittık gaz esebınen qamtamasyz ettı», - dedı ol.
Sonymen qatar, soltüstık öŋırlerdı gazdandyru jobasy boiynşa «QazaqGaz» ben «Gazprom» arasynda kelısım aiasyndaǧy jūmystar jalǧasuda.
Vedomstvo ökılınıŋ mälımetınşe, jyl soŋyna deiın jobanyŋ negızgı tehnikalyq jäne kommersiialyq şarttary naqtylanady. Josparǧa säikes, 2030 jylǧa qarai Qazaqstannyŋ soltüstık öŋırlerıne gaz jetkızu közdelıp otyr.
