Almatyda «2025 jylǧy Türkı älemınıŋ jastar astanasy» märtebesı aiasyndaǧy qorytyndy ıs-şaralar öttı. Bes kün boiy Qazaqstan, Türkiia, Äzırbaijan, Qyrǧyzstan, Özbekstan jäne Türıkmenstannyŋ jastar delegasiialary türkı memleketterı jastary arasyndaǧy yntymaqtastyqty nyǧaituǧa baǧyttalǧan bılım beru, dialog, ekologiialyq, erıktılık jäne mädeni jobalarǧa qatysty.
Is-şaralar baǧdarlamasy Qazaqstan Respublikasynyŋ Prezidentı Qasym-Jomart Toqaev aiqyndaǧan negızgı basymdyqtarǧa säikes äzırlendı. Olar sifrlandyru jäne jasandy intellekt, «Zaŋ men tärtıp» qaǧidaty, «Taza Qazaqstan» ekologiialyq bastamasy jäne erıktılık qozǧalysty damytu.
Sifrlandyru baǧyty aiasynda Türkı memleketterı ūiymyna müşe elderdıŋ jastary men sarapşylary qatysqan halyqaralyq Digital Turkic Youth forumy öttı. Tehnologiialyq kompaniialar men bılım beru ūiymdarynyŋ ökılderı jasandy intellekttıŋ damuy, sifrlyq tehnologiia, bolaşaqtyŋ qūzyretterı jäne eŋbek naryǧyndaǧy özgerıster jaiyn talqylady.
Adami kapitaldy damytu mäselesıne arnalǧan Kazakhstan–Turkey Psychosocial Support Project halyqaralyq forumy Qazaqstan men Türkiianyŋ sarapşylaryn bır alaŋǧa jinady. Qatysuşylar jastarǧa psihoäleumettık qoldau körsetu, emosionaldyq tūraqtylyqty arttyru jäne daǧdarys jaǧdailarynyŋ aldyn alu mäselelerın qarastyrdy. Sonymen qatar, delegasiialar Almatynyŋ Tötenşe jaǧdailar departamentıne baryp, küizelıske tözımdılıktı arttyru boiynşa täjıribelık treningke qatysty.
Sport baǧyty boiynşa qatysuşylar «Qairat» futbol kluby akademiiasynda jas sportşylardy daiarlau jüiesımen tanysty.
Is-şaralardyŋ maŋyzdy bölıgınıŋ bırı Türkı memleketterı ūiymynyŋ halyqaralyq jastar kempingı boldy. Onyŋ aiasynda jastar diplomatiiasy men mädenietaralyq yntymaqtastyqqa arnalǧan Beyond Borders: Youth Without Borders sessiiasy, sondai-aq sifrlandyru, ekologiia, erıktılık jäne qoǧamdyq damu baǧyttaryndaǧy bastamalardy äzırleuge arnalǧan Youth Solutions Lab hakatony ūiymdastyryldy.
Halyqaralyq erıktılıktı damytuǧa erekşe köŋıl bölındı. Erıktılerdıŋ halyqaralyq jyly aiasynda jüzege asqan «Attaşe mektebı» jobasyna qatysuşylar halyqaralyq hattama men mädenietaralyq kommunikasiia negızderın meŋgerıp, şeteldık delegasiialardy qoldauǧa atsalysty.
«Taza Qazaqstan» bastamasyn qoldau maqsatynda Turkic Youth Tree of Unity ekologiialyq aksiiasy öttı. Türkı memleketterınıŋ jas ökılderı qorşaǧan ortany qorǧaudaǧy ortaq jauapkerşılık pen bırlıktıŋ belgısı retınde aǧaş ektı.
«Zaŋ men tärtıp» qaǧidatyn nasihattau aiasynda azamattyq jauapkerşılık, qūqyqtyq mädeniet jäne qoǧamdyq qauıpsızdık mäselelerı boiynşa taqyryptyq kezdesuler men pıkırtalas alaŋdary ūiymdastyryldy.
14 mausym künı jobanyŋ saltanatty jabylu räsımı ötıp, qorytyndylandy. Sondai-aq, Türkı älemınıŋ jastar astanasynyŋ simvolikalyq kıltı Özbekstan Respublikasynyŋ ökılderıne tabystaldy.
Aita ketu kerek, 2025-2026 jyldary atalǧan märtebenı ıske asyru kezeŋınde Almatyda 8 myŋnan astam jasty qamtyǧan 60-tan astam ıs-şara ötkızıldı. Būl joba jastar diplomatiiasyn nyǧaituǧa, gumanitarlyq bailanystardy keŋeituge jäne halyqaralyq jastar yntymaqtastyǧyn damytuǧa yqpal etıp, Almatynyŋ türkı älemınıŋ jetekşı jastar ortalyqtarynyŋ bırı retındegı märtebesın taǧy bır märte aiqyndady.
