Almaty qalasyndaǧy päterlerdıŋ bırınen şeteldık azamattyŋ mäiıtı tabyldy. Būl turaly aqparat äleumettık jelıde tarady, dep habarlaidy “Adyrna” ūlttyq portaly.
CMN.KZ Telegram-arnasynyŋ mälımetınşe, Äuezov audanyndaǧy päterde 50 jastaǧy Resei azamatynyŋ bölşektelgen mäiıtı tabylǧan. Atalǧan derektı Almaty qalalyq Polisiia departamentı rastady. Küdıktı retınde onymen bırge tūrǧan äiel ūstaldy.
“Būl derek boiynşa Äuezov audandyq Polisiia basqarmasy qylmystyq ıs qozǧady. Küdıktı ūstalyp, uaqytşa ūstau izoliatoryna qamaldy. Basqa män-jailar anyqtalyp jatyr”, – dep habarlady qalalyq PD baspasöz qyzmetı.
KTK telearnasynyŋ mälımetınşe, er adamnyŋ mäiıtınıŋ aldymen bölşektelıp, sosyn örtelgenı anyqtaldy. Küdıktı retınde marqūmmen bırge tūrǧan äiel qamauǧa alynǧan. Alaida marqūmnyŋ qyzy äkesınıŋ auyryp köz jūmǧanyn aitady. Al marqūm mäiıtınıŋ örteluın közı tırısınde özı sūraǧan eken. Marqūm ūstanǧan dınnıŋ joralǧysy sondai deidı tuystary.
Jantürşıgerlık oqiǧa qalanyŋ törtınşı şaǧyn audanynda boldy. Mäiıt tabylǧan päterge alǧaş bolyp poliseilermen bırge kuä retınde aula sypyruşy da kırıptı.
“Baltamen şauyp tastaǧan. Vannaǧa bölşektep-bölşektep kırgızıp, jatqyzyp qoiǧan. Bölşektep tastaǧannan keiın üstınen ot jaqqan. Qaraiyp ketken ǧoi, tyrnaqtary. Bır-ekı sausaǧy küiıp ketken, qap qara bolyp. Är jerınen jaqqan. Qolynyŋ üstıne qaǧaz jaqqan ba, äiteuır örtegen”, – deidı aula sypyruşy Nūrlan Japarqūlov.
Ūqsas jaŋalyqtar
