Prezident Qasym-Jomart Toqaev qazaqstandyqtardy Qūrban ait merekesımen qūttyqtady, dep habarlaidy «Adyrna» tılşısı.
Memleket basşysy būl meiramnyŋ halqymyzdyŋ ruhani ömırındegı orny erekşe ekenın atap ötıp, Qūrban ait künderı meiırımdılık, qaiyrymdylyq, özara qūrmet pen janaşyrlyq sekıldı asyl qasietter keŋınen därıpteletının aitty.
«Qūrban ait künderı azamattarymyz özgege qol ūşyn beru, ülkenge qūrmet, kışıge ızet körsetu jäne el bolaşaǧy üşın ortaq jauapkerşılıktı sezınu airyqşa maŋyzdy ekenın ūǧyna tüsedı. Būl – ädıldık pen adamgerşılıktı, oi men sana tazalyǧyn arqau etken islam ılımınıŋ ūlaǧatyn dūrys tüsınıp, taǧylymyn tereŋırek tanuǧa zor yqpal etetın erekşe kezeŋ.
Tüptep kelgende, bızdıŋ asyl dınımız de, elımızdegı basqa dästürlı dınder de halqymyzdyŋ ruhani damuyna, ūrpaqtar arasyndaǧy sabaqtastyq pen qoǧamdaǧy yntymaq-bırlıktıŋ artuyna negız bolyp otyr»,–dedı ol.
Qasym-Jomart Toqaev elımızdegı dästürlı dınderdıŋ qoǧamdaǧy yntymaq pen bırlıktı nyǧaitudaǧy rölıne de toqtaldy.
«Bärımız üşın elımızdıŋ Egemendıgı men Täuelsızdıgınen biık eşnärse joq. Konstitusiia – halqymyzdyŋ bolmys-bıtımınıŋ ainasy, ūlttyq bıregeilıgımızdıŋ özegı. Sondyqtan el tūtastyǧyn küşeitu, etnosaralyq jäne konfessiiaaralyq kelısımdı nyǧaitu memleket saiasatynyŋ asa maŋyzdy baǧyty, konstitusiialyq mındetı sanalady.
El ışındegı tūraqtylyq pen tynyştyqty közdıŋ qaraşyǧyndai saqtau – ärbır otanşyl azamattyŋ perzenttık paryzy. Būl – qazırgıdei almaǧaiyp zamanda memleketımızdı odan ärı körkeitıp, Ädılettı jäne Ozyq Qazaqstandy qūrudyŋ bırden-bır şarty. Bız aldaǧy uaqytta halqymyzdyŋ yrysty yntymaǧy men jasampaz ruhynyŋ arqasynda biık belesterdı baǧyndyra beremız. Men būǧan kämıl senemın. Barşaŋyzǧa zor densaulyq pen baq-bereke tıleimın! Qūrban ait qabyl bolsyn!»– dep tüiındı prezident.
