3 mamyr – türkı halyqtarynyŋ ruhani jaqyndyǧy men tarihi bırlıgın eske salatyn maŋyzdy künderdıŋ bırı. Būl kün Türkiiada, Äzerbaijanda jäne özge de türkıtıldes memleketterde Türkışıldık künı (Türkçülük Günü) nemese Türkı älemınıŋ yntymaqtastyq künı retınde atalyp ötedı.
Türkışıldık künınıŋ paida boluy 1944 jylǧy oqiǧalarmen tyǧyz bailanysty. Sol jyly 3 mamyrda Ankara qalasynda türkışıl ziialylardy qoldaǧan jappai şeruler öttı. Būl oqiǧalar bilık tarapynan qysymǧa ūşyrap, bırqatar körnektı tūlǧalar tūtqyndaldy. Olardyŋ qatarynda Nihal Atsyz, Zäki Uälidi Toǧan, Alparslan Türkeş jäne Reha Oǧyz Türkkan boldy.
Olar «näsılşıldık-tūranşyldyq» aiybymen Tophane äskeri türmesı qamaldy. Būl oqiǧa türkışıl qozǧalystyŋ tarihynda maŋyzdy betbūrys kezeŋ retınde este qaldy.
1945 jyldan bastap türkışıl közqarasty ūstanuşylar 3 mamyrdy ūlttyq sana-sezımnıŋ, erkın oidyŋ jäne bauyrlastyqtyŋ belgısı retınde atap öte bastady. Uaqyt öte kele būl kün saiasi sipattan görı mädeni jäne ruhani mazmūnǧa ie boldy.
Bügınde Türkışıldık künı – türkı halyqtarynyŋ ortaq tarihi tamyryn, mädeni jäne tıldık jaqyndyǧyn, özara yntymaqtastyǧyn därıpteitın kün.
Būl mereke türlı konferensiialar, mädeni ıs-şaralar, ǧylymi kezdesuler arqyly atap ötıledı. Türkı älemındegı yntymaq pen özara tüsınıstıktı nyǧaitu – onyŋ basty maqsaty.
3 mamyr – tek tarihi oqiǧany eske alu künı ǧana emes, sonymen qatar türkı halyqtarynyŋ bırlıgı men bolaşaqtaǧy yntymaqtastyǧyna baǧyttalǧan simvoldyq mereke. Ol ortaq qūndylyqtardy qadırleuge, mädeni mūrany saqtauǧa jäne halyqtar arasyndaǧy bailanysty nyǧaituǧa şaqyrady.
