Işkı ıster ministrlıgı qazaqstandyqtarǧa ündeu jasap, terrorizm turaly jalǧan habarlama üşın jauapkerşılık baryn eskerttı, dep habarlaidy «Adyrna» tılşısı.
IIM jarylǧyş zat qoiu nemese qoǧamdyq qauıpsızdıkke özge de qauıpter turaly jalǧan aqparatty bailanys qūraldary, internet-resurstar men äleumettık jelıler arqyly taratu faktılerı tırkelıp jatqanyn atap öttı. Ministrlık mūndai äreketter äzıl, qaljyŋ retınde jasalsa da, qylmystyq qūqyq būzuşylyq retınde baǧalanatynyn jetkızdı.
«Terrorizm aktısı turaly körıneu jalǧan habarlamalar qoǧamdyq qauıpsızdıkke qauıp töndırıp, jappai evakuasiialarǧa, memlekettık organdardyŋ, bılım beru, medisinalyq jäne basqa da äleumettık nysandardyŋ jūmysynyŋ toqtauyna äkeledı, sondai-aq şūǧyl qyzmetterdıŋ eleulı küşterı men qūraldaryn alaŋdatady. Būl qylmysty jasaǧany üşın QR zaŋnamasyna säikes bas bostandyǧynan aiyruǧa deiıngı jaza qarastyrylǧan»,- delıngen habarlamada.
Osyǧan bailanysty polisiia azamattardy tekserılmegen aqparatty taratpauǧa, jalǧan şaqyrular men habarlamalar jasamauǧa, balalarǧa terrorizm aktısı turaly jalǧan habarlamalar üşın jauapkerşılık bar ekenın tüsındıruge, qauıp-qaterı bar habarlamalar alǧan jaǧdaida dereu polisiiaǧa habarlauǧa şaqyrdy.
