Özbekstan men Ukraina bilıgı soǧys qimyldary aimaǧynda tūtqynǧa tüsken azamattar ısı boiynşa jeke formatta özara yntymaqtastyq ornatady. Būl turaly Gazeta.uz basylymy jazdy, dep habarlaidy «Adyrna» tılşısı.
2 säuırde Ukraina syrtqy ıster ministrınıŋ orynbasary Aleksandr Mişenkonyŋ Taşkentke jasaǧan sapary aiaqtalǧan bolatyn. Kezdesu qorytyndysy boiynşa diplomat ukrain tarapynyŋ ärbır jaǧdaidy özbek vedomstvolarymen özara ärekettese otyryp, jeke-jeke qarastyruǧa daiyn ekenın mälımdedı. Sondai-aq ol tūtqynǧa alynǧan Özbekstan azamattary äskeri tūtqyndar retınde qarastyrylatynyn jäne olarǧa halyqaralyq normalarǧa säikes gumandyq qarym-qatynasqa kepıldık berıletının eske saldy.
«Qaru alyp Ukrainaǧa qarsy soǧysqan jäne tūtqynǧa tüsken būl adamdardy bız äskeri tūtqyndar dep sanaimyz. Bıraq bızdıŋ gumandyq qarym-qatynasymyz bar. Qalǧan mäseleler arnaiy qyzmetter men osy ıstermen ainalysatyn organdar arqyly jeke arnalarmen qaralady. Bız özbekstandyq ärıptesterımızben bailanys ornatuǧa daiynbyz, būl mäsele boiynşa tolyq tüsınıstık bar», — dedı ol.
Ministr soǧysqa tartu shemasy aldau, bopsalau jäne tabys uädelerı arqyly jüzege asatynyn atap öttı. Diplomat Özbekstan tarapyn halyqty qauıp-qater turaly belsendırek habardar etuge jäne «jastardyŋ osyndai qiyn jaǧdailarǧa duşar boluyna jol bermeu üşın nauqandar jürgızuge» şaqyryp, aldyn alu şaralarynyŋ qajettıgın jetkızdı.
«Bız dostas elderdıŋ azamattary qaqtyǧysqa qatysuşylar qatarynda bolǧanyn mülde qalamaimyz», — dedı diplomat.
Jurnalistermen kezdesude Mişenko Ukraina Ortalyq Aziiamen S5+1 formatynda yntymaqtastyqqa müddelı ekenın de atap öttı.
Eske salaiyq, 2025 jyldyŋ qaraşasynda Özbekstan 2022 jyldan berı elde azamattardyŋ şeteldegı qaruly qaqtyǧystarǧa qatysu faktılerı boiynşa 338 qylmystyq ıs qozǧalǧanyn habarlaǧan edı.
