Qazaqstannyń Ýkraınadaǵy elshisi Darhan Káletaev Ýkraına men Reseı arasyndaǵy soǵystyń shıelenisýine baılanysty Kıevtegi jaǵdaıǵa málimdeme jasady, dep habarlaıdy “Adyrna” ulttyq portaly Ulysmedia aqparat kózine silteme jasap.
22 qarashadaǵy aqparatqa sáıkes, elshiniń aıtýynsha, Ýkraınada konsýldyq esepte 1789 Qazaqstan azamaty tirkelgen, onyń ishinde 1193 adam turaqty esepte, al 596 adam ýaqytsha esepte tur.
Darhan Káletaev qazaqstandyqtardan evakýaııa týraly ótinish túspegenin habarlady.
— Elshilikke evakýaııa týraly ótinishter túsken joq. Qazirgi ýaqytta biz Ýkraına aýmaǵyndaǵy 300 Qazaqstan azamatynyń jaǵdaıyn baqylap, baılanys ustap otyrmyz, — dep naqtylady ol.
Sonymen qatar elshi artıllerııalyq jáne áýe shabýyldary sanynyń kóbeıýine baılanysty 20 qarashada elshilik Qazaqstan azamattaryna belsendi urys qımyldary júrip jatqan aımaqtardan ketýdi nemese óz qaýipsizdigin qamtamasyz etý úshin elden shyǵý múmkindigin qarastyrýdy usynǵanyn aıtty.
Kıevtegi jaǵdaıǵa qatysty suraqqa jaýap bere otyryp, Darhan Káletaev dron soqqylarynyń elshilik ǵımaratyna jıi estile bastaǵanyn atap ótti.
Buǵan deıin Qazaqstan Prezıdenti Qasym-Jomart Toqaev premer-mınıstrge, Prezıdent ákimshiligi basshysyna, barlyq kúshtik qurylymdardyń jetekshilerine jáne ákimderge Ýkraına tóńiregindegi jaǵdaıdyń shıelenisýine baılanysty áskerı jáne azamattyq nysandardyń qaýipsizdigin qamtamasyz etý boıynsha shuǵyl sharalar qabyldaýdy tapsyrǵan bolatyn.
Qazaqstan premer-mınıstri Oljas Bektenov prezıdent tapsyrmalaryn oryndaý, áskerı jáne azamattyq nysandardyń qaýipsizdigin qamtamasyz etý máseleleri boıynsha keńes ótkizdi.
