Qyrǧyzstannyŋ ışkı ıster ministrlıgı «Qyrǧyzneftegaz» aşyq aksionerlık qoǧamyndaǧy jemqorlyq shemasynyŋ egjei-tegjeiı körsetılgen beinerolik jariialady. Būl ıs boiynşa Joǧarǧy Keŋestıŋ būrynǧy deputaty Şaiyrbek Täşiev ūstalǧan bolatyn, dep habarlaidy «Adyrna» tılşısı.
Tergeu mälımetınşe, «Qyrǧyz Petroleum Kompani» memlekettık mūnai öŋdeu zauyty bar bolǧanyna qaramastan, mūnai jetkızudı tıkelei emes, deldal kompaniialar arqyly jüzege asyrylǧan. Şikızat aldymen osy qūrylymdarǧa berılıp, keiın sol memlekettık käsıporynnyŋ özıne qaita satylǧan.
Nätijesınde tızbekke jasandy deldaldar engızılıp, solar arqyly qarjy qarajattary syrtqa şyǧarylǧan.
Aldyn ala derekter boiynşa mūnaidyŋ edäuır bölıgı Täşievke bailanysty qūrylymdar arqyly osy shema boiynşa satylǧan. Sonyŋ saldarynan memleketke asa ırı kölemde, iaǧni 4 milliard 115 million somnan astam şyǧyn keltırılgen.
Būl somaǧa jıberıp alǧan paida men tölenbegen salyqtar kıredı. Atap aitqanda, 2023 jyl üşın «Qyrǧyzneftegazdyŋ» salyq bereşegı şamamen 60,5 million som, al «Qyrǧyz Petroleum Kompani» boiynşa şamamen 54,5 million som dep baǧalanyp otyr.
IIM keltırılgen şyǧyn tolyq kölemde öteluge tiıs ekenın atap öttı. Tergeu jalǧasuda.
