Қырғызстанның ішкі істер министрлігі «Қырғызнефтегаз» ашық акционерлік қоғамындағы жемқорлық схемасының егжей-тегжейі көрсетілген бейнеролик жариялады. Бұл іс бойынша Жоғарғы Кеңестің бұрынғы депутаты Шайырбек Тәшиев ұсталған болатын, деп хабарлайды «Адырна» тілшісі.
Тергеу мәліметінше, «Қырғыз Петролеум Компани» мемлекеттік мұнай өңдеу зауыты бар болғанына қарамастан, мұнай жеткізуді тікелей емес, делдал компаниялар арқылы жүзеге асырылған. Шикізат алдымен осы құрылымдарға беріліп, кейін сол мемлекеттік кәсіпорынның өзіне қайта сатылған.
Нәтижесінде тізбекке жасанды делдалдар енгізіліп, солар арқылы қаржы қаражаттары сыртқа шығарылған.
Алдын ала деректер бойынша мұнайдың едәуір бөлігі Тәшиевке байланысты құрылымдар арқылы осы схема бойынша сатылған. Соның салдарынан мемлекетке аса ірі көлемде, яғни 4 миллиард 115 миллион сомнан астам шығын келтірілген.
Бұл сомаға жіберіп алған пайда мен төленбеген салықтар кіреді. Атап айтқанда, 2023 жыл үшін «Қырғызнефтегаздың» салық берешегі шамамен 60,5 миллион сом, ал «Қырғыз Петролеум Компани» бойынша шамамен 54,5 миллион сом деп бағаланып отыр.
ІІМ келтірілген шығын толық көлемде өтелуге тиіс екенін атап өтті. Тергеу жалғасуда.
