Atyrau oblysy Mahambet audanyndaǧy Saraişyq auylynyŋ tūrǧyndary referendumǧa belsendı qatysuda. Tarihi Saraişyq – qazaq dalasyndaǧy maŋyzdy saiasi jäne mädeni ortalyqtardyŋ bırı, Qazaq handyǧy däuırınde el taǧdyryna qatysty maŋyzdy şeşımder qabyldanǧan kielı meken retınde belgılı.
Tarihi derekterge säikes, osy öŋırde Qasym han bilık qūrǧan, sondai-aq qazaqtyŋ alǧaşqy qūqyqtyq jüielerınıŋ bırı sanalatyn «Qasym hannyŋ qasqa joly» zaŋdary qalyptasqan.
Bügınde köne Saraişyqtyŋ tūrǧyndary dauys beru uchaskelerıne kelıp, el bolaşaǧyna qatysty maŋyzdy şeşım qabyldau üderısıne öz ülesterın qosuda.
Saraişyq memlekettık tarihi-mädeni muzei-qoryǧynyŋ direktory Abilseiıt Mūhtar būl künnıŋ simvoldyq maŋyzy erekşe ekenın atap öttı.
«Saraişyq – qazaq memlekettılıgınıŋ qalyptasuynda maŋyzdy röl atqarǧan tarihi meken. Osyndai qasiettı jerde tūratyn halyqtyŋ bügıngı maŋyzdy saiasi oqiǧaǧa qatysuy – ötken men bügınnıŋ sabaqtastyǧyn körsetedı. Būl – tarih pen qazırgı uaqytty bailanystyratyn maŋyzdy qadam», – dedı ol.
Jergılıktı tūrǧyndardyŋ aituynşa, dauys beru – ata-babalar amanatyna adaldyq tanytyp, el bolaşaǧyna beijai qaramaityn azamattyq jauapkerşılıktıŋ körınısı.
