Qazaqstanda medisina qyzmetkerlerıne qatysty fizikalyq küş qoldanu men qorqytu äreketterı üşın jazany küşeitu turaly Memleket basşysynyŋ tapsyrmasymen äzırlenıp, qabyldanǧan Qylmystyq kodekske engızılgen özgerıster küşıne endı. Būl turaly Densaulyq saqtau ministrlıgı mälımdedı, dep habarlaidy "Adyrna".
Aqparatqa säikes, būl özgerıster Qylmystyq kodekske jaŋa bap engızudı közdeidı.
"Atalǧan bap medisina qyzmetkerlerınıŋ, sondai-aq jedel medisinalyq järdem brigadalary jürgızuşılerınıŋ qyzmettık mındetterın atqaru kezınde olardyŋ ömırıne, densaulyǧyna jäne qauıpsızdıgıne qol sūǧu üşın qylmystyq jauapkerşılıktı belgıleidı", — dep tüsındırdı vedomstvo.
Qūjat normalaryna säikes:
• küş qoldanu qaupın töndırgenı üşın 200-den 500-ge deiın ailyq eseptık körsetkış (AEK) mölşerınde aiyppūl salu, ne sol mölşerde tüzeu jūmystary, ne 300 saǧatqa deiın qoǧamdyq jūmystar, ne 2 jylǧa deiın bas bostandyǧyn şekteu nemese aiyru jazasy közdelgen;
• atalǧan äreketter auyrlatatyn män-jailarda jasalǧan jaǧdaida jaza küşeitılıp, 2 jyldan 3 jylǧa deiın bas bostandyǧyn şekteu nemese aiyrudy qūraidy;
• ömırge jäne (nemese) densaulyqqa qauıptı emes küş qoldanylǧan jaǧdaida 500-den 1000-ǧa deiın ailyq eseptık körsetkış (AEK) mölşerınde aiyppūl, ne sol mölşerde tüzeu jūmystary, ne 600 saǧatqa deiın qoǧamdyq jūmystar, ne 2 jyldan 3 jylǧa deiın bas bostandyǧyn şekteu nemese aiyru jazasy közdelgen;
• ömır men densaulyqqa qauıptı küş qoldanu 5 jyldan 10 jylǧa deiın bas bostandyǧynan aiyru jazasymen, al auyrlatatyn män-jailar bolǧan jaǧdaida 7 jyldan 12 jylǧa deiın bas bostandyǧynan aiyru jazasymen jazalanady.
Sonymen qatar, zaŋnamalyq özgerıstermen qatar medisinalyq ūiymdarda medisina qyzmetkerlerınıŋ jūmys oryndaryndaǧy qauıpsızdıgın küşeitu boiynşa qosymşa şaralar engızılıp jatyr.
