Astanada ötıp jatqan Konstitusiialyq reforma jönındegı komissiianyŋ alǧaşqy otyrysynda Qoldanbaly ekonomikalyq zertteuler ortalyǧynyŋ ǧylymi jetekşısı Jaqsybek Qūlekeev elımızdegı ǧylymi qyzmettıŋ Ata Zaŋ deŋgeiınde naqty rettelmegenın, sonyŋ saldarynan el damuyn qamtamasyz etudegı ǧylymnyŋ rölı men märtebesı tömen ekenın mälımdedı.
Onyŋ aituynşa, elımızdıŋ qazırgı damu kezeŋındegı basty basymdyqtyŋ bırı – zamanaui sifrlyq tehnologiialar men jasandy intellektını keŋınen qoldanuǧa negızdelgen bılım men innovasiiaǧa süiengen ekonomikany qalyptastyru. Būl baǧyt elımızdıŋ bäsekege qabılettılıgın arttyryp qana qoimai, onyŋ geoekonomikalyq jäne geosaiasi keŋıstıktegı ūstanymyn aiqyndai tüsedı.
«Älemde ǧylym kez kelgen qoǧamnyŋ eŋ maŋyzdy öndırgış küşıne ainalyp otyr. Būl tūrǧyda bılım ekonomikasyn damytu ǧylymmen tıkelei bailanysty ekenın aŋǧarmau mümkın emes. Alaida elımızdegı ǧylymi qyzmet salalyq zaŋnamalarmen ǧana rettelıp, onyŋ negızgı qaǧidattary Konstitusiia deŋgeiınde naqty bekıtılmegen. Ata Zaŋda ǧylymǧa qatysty arnaiy normalardyŋ bolmauy ǧylymi salany aǧymdaǧy memlekettık saiasatqa täueldı etıp, eldıŋ tūraqty damuyn qamtamasyz etudegı rölı men märtebesın älsıretıp otyr» dedı ol.
Jaqsybek Qūlekeev ǧylym men innovasiianyŋ konstitusiialyq deŋgeide bekıtıluı ǧylymi qyzmettı tūraqty qarjylandyruǧa berık qūqyqtyq negız qalyptastyryp, zertteu ortalyqtarynyŋ, universitetterdıŋ jäne tehnologiialyq kompaniialardyŋ jüielı ärı ornyqty jūmys ısteuıne jol aşatynyn aitty.
Onyŋ sözınşe, mūndai normalar köptegen damyǧan memleketterdıŋ konstitusiialarynda bar. Atap aitqanda, ǧylym men innovasiiaǧa süienıp, eleulı ekonomikalyq tabysqa qol jetkızgen Germaniia, Japoniia, Oŋtüstık Koreia siiaqty elderdı mysalǧa keltıruge bolady. Sondai-aq Finliandiia, İspaniia jäne Portugaliianyŋ öz konstitusiialarynda ǧylymi avtonomiia men akademiialyq erkındıkke qūqyqty naqty bekıtkenın tılge tiek etken maman ūlttyŋ bolaşaǧy azamattardyŋ ziiatkerlık jäne tehnologiialyq damuyna tıkelei bailanysty ekenın tereŋ tüsınuden tuyndaitynyn jetkızdı.
«Ūlttyq qauıpsızdık tūrǧysynan alǧanda, özımızdıŋ ǧylymi jäne tehnologiialyq äzırlememızdı damytu tehnologiialyq täuelsızdıktı nyǧaityp, ekonomikanyŋ jäne onyŋ asa maŋyzdy infraqūrylymynyŋ tūraqtylyǧyn qamtamasyz etedı. Sonymen qatar, Konstitusiiada ǧylymǧa qatysty normalardyŋ boluy memlekettıŋ halyqaralyq bedelın arttyryp, ony progress pen innovasiiaǧa baǧdarlanǧan el retınde tanytady. Būl ǧylymi-tehnikalyq damudyŋ basymdyq ekenın aiqyn körsetıp, investisiia tartuǧa yqpal etedı. Sondai-aq älemdık qauymdastyqtaǧy abyroiymyzdy küşeitıp, äleumettık, ekonomikalyq jäne tehnologiialyq tūraqtylyqtyŋ berık negızın qalaidy», – dedı ol.
