Aqtauda äskeri qyzmetkerdı qyzmettık KamAZ jük kölıgı qaǧyp kettı, dep habarlaidy "Adyrna" ūlttyq portaly.
Qūrlyq äskerlerı baspasöz qyzmetınıŋ mälımetınşe, jol-kölık oqiǧasy 14 qaŋtar künı äskeri bölımşenıŋ Aqtau garnizonyna qarasty Oimaşa poligonynan qaityp kele jatqan kezde bolǧan.
«Qolaisyz aua raiy jaǧdaiynda, köktaiǧaq kezınde jäne köru aimaǧy şekteulı bolǧan sätte KamAZ avtokölıgı kelısımşart negızınde qyzmet atqarǧan äskeri qyzmetkerdı, kışı serjant G-ny qaǧyp ketken», – delıngen resmi habarlamada.
Äskeri qyzmetker alǧan jaraqattarynyŋ saldarynan oqiǧa ornynda köz jūmdy. Atalǧan derek boiynşa sotqa deiıngı tergeu bastalyp, oqiǧanyŋ barlyq män-jaiy anyqtalyp jatyr.
Qaruly küşter qolbasşylyǧy qaza tapqan äskeri qyzmetkerdıŋ tuǧan-tuystary men jaqyndaryna qaiǧyra köŋıl aityp, marqūmnyŋ otbasyna qajettı kömek körsetıletının mälımdedı.
