AQŞ äkımşılıgı 15 qaŋtarǧa auǧan tünnen bastap aldaǧy 24 saǧat ışınde İranǧa äskeri soqqy beruı mümkın. Būl turaly Reuters agenttıgıne joǧary lauazymdy europalyq şeneunık aitqan, dep habarlaidy «Adyrna» tılşısı.
Agenttıktıŋ basqa bır derekközı amerikalyq aralasudyŋ mümkın ekenın atap körsetken. Al İzrail şeneunıgı prezident Donald Tramp soqqylarǧa qatysty şeşım qabyldaǧanyn, bıraq olardyŋ naqty kölemı men uaqyttary älı naqtylanatynyn mälımdedı.
Jaqynda Aq üi basşysy İran halqyn narazylyqtardy jalǧastyruǧa şaqyryp, olarǧa «kömek jaqyn arada keledı» dep uäde bergen edı.
İrandaǧy auqymdy narazylyqtar 28 jeltoqsannan berı jalǧasyp keledı. Bastapqyda Tegerandaǧy demonstranttardyŋ talaptary ekonomikalyq tūraqtylyqty qamtamasyz etuge qatysty bolsa, keiın oǧan saiasi talaptar qosyldy.
Eŋ ırı narazylyqtarTegeran qalasynda ötken, al eŋ qataŋ qaqtyǧystar eldıŋ batysy men oŋtüstık-batysynda – Malekşah, Kermanşah jäne Lordegan qalalarynda tırkelgen. AQŞ-ta ornalasqan HRANA adam qūqyqtary ūiymynyŋ mälımetı boiynşa, düisenbı künı 10 myŋ 700-den astam tūtqyndau faktısı tırkelgen, bıraq būl sandar resmi türde rastalǧan joq.
Osyǧan bailanysty İrannyŋ oppozisiialyq Iran International veb-saity naqty qaza tapqandar sany 12 myŋǧa jetuı mümkın ekenın mälımdedı. Odan aldyn Reuters İrannyŋ resmi ökılderıne sıltep, narazylyqtan şamamen ekı myŋ adam qaza tapqanyn habarlaǧan. Bilık narazylyqqa şyqqandardy "terrorister" dep ataǧan soŋ, basyp-janşu operasiiasy bastalǧan. Elde 9 qaŋtardan berı internet tolyqtai öşırıldı, telefon bailanysy toqtatylǧan. Memlekettık aqparat qūraldary resmi tūlǧalarǧa sıltep narazylyq barysynda qaza tapqandardyŋ kınäsın "terroristerge" audaryp otyr. Narazylyqqa şyqqandardy İran basşylary "terrorister", "būzaqylar" jäne "ekstremister" dep atap otyr.
Bügın «Adyrna» ūlttyq portaly da özınıŋ kezektı video-sūqbatynda İrandaǧy tolqulardyŋ şyǧu sebebı men saldaryn talqylaǧan. Onda AQŞ-tyŋ İranǧa qatysty şarasy Aq üide qaralyp, bügın şeşım qabyldanuy mümkın ekendıgı aitylǧan.
