Astananyŋ polisiia departamentı Kaspii qūbyr konsorsiumyna (KQK) qatysty terıs pıkır bıldırgen azamattarǧa qatysty aldyn ala tergeu jürgızudı bastady, dep habarlaidy "Adyrna" ūlttyq portaly Tengrinews.kz-ke sıltep.
Būl turaly Bas prokuraturanyŋ basşysy Berık Asylov mälımdedı.
Mälımetke säikes, 17 jeltoqsanda Mäjılıs deputaty Aidos Sarym azamattardyŋ KQK infraqūrylymyna şabuylǧa qoldau bıldıruın zaŋ tūrǧysynan baǧalaudy sūraǧan.
Bas prokurordyŋ sözınşe, 17 jeltoqsanda Astana polisiiasy Qylmystyq kodekstıŋ 174-babynyŋ 1-bölımı — «Ūltaralyq arazdyq qozdyru» boiynşa tergeu tırkelgenı aitylǧan. Tergeu aiasynda azamattardy anyqtau jäne olardyŋ kınäsın däleldeitın materialdar jinau jūmystary jürgızılude. Qorytyndy boiynşa olardyŋ äreketterıne qūqyqtyq baǧa berılıp, prosessualdyq şeşım qabyldanady.
KQK-nan tolyq bas tartu mümkındıgı men balamaly eksporttyq marşruttar turaly aqparatqa qatysty taldau aldaǧy uaqytta jariialanuy mümkın.
Bır ait keterlıgı - deputat Aidos Sarym 17 jeltoqsanda Bas prokuraturadan atalǧan jariialanymdarǧa qūqyqtyq baǧa berıp, olardy terrorizmdı nasihattau (QR QK 256-baby) nemese memlekettık opasyzdyq (QR QK 175-baby) retınde qarastyrudy da sūraǧan bolatyn.
Sonymen qatar ol halyq arasynda tüsındıru jūmystaryn jürgızıp, mūnai qūbyrlary men eldıŋ ekonomikalyq qauıpsızdıgı üşın asa maŋyzdy özge de infraqūrylym nysandaryn joiuǧa şaqyratyn aqparatty taratuǧa bolmaitynyn tüsındırudı ūsyndy.
KQK — Qazaqstan mūnaiyn eksporttaudyŋ negızgı baǧyty. El jyl saiyn osy qūbyr arqyly kemınde 60 million tonna mūnai jöneltedı. Qazırgı uaqytta Qazaqstan şabuyldan keiıngı şyǧyndardy eseptep jatyr. Energetika ministrı Erlan Aqkenjenovtıŋ mälımdeuınşe, Qazaqstan şabuyl saldarynan kem degende 480 myŋ tonna mūnai öndıre almai qalǧan.
Eske salaiyq, 29 qaraşada Astana uaqytymen 06:06-da Novorossiisk porty audanynda KQK-nyŋ teŋız infraqūrylym nysandaryna ekipajy joq jüzu qūraldary arqyly şabuyl jasalǧan edı. Şabuyl nätijesınde teŋızdegı qaşyqtaǧy ailaq qondyrǧysy VPU-2 (qalqymaly tieu qūrylǧysy) aitarlyqtai zaqymdalǧan.
