Elordadaǧy «Astana» futbol kluby BI Group kompaniiasynyŋ negızın qalauşy Aidyn Rahymbaevtyŋ qoldauyna ie bolady, dep habarlaidy "Adyrna" ūlttyq portaly.
Ükımettegı brifing barysynda turizm jäne sport ministrı Erbol Myrzabosynov "Astana" klubyna qyzyǧuşylyq tanytqan investor bar ekenın habarlaǧan edı.
"Bız qazır belsendı türde jūmys ıstep jatyrmyz, investor bar. Alaida räsımder tolyq aiaqtalǧanǧa deiın onyŋ kım ekenın jariialai almaimyz. Degenmen investordyŋ bar ekenın naqty aita alamyn", — degen Erbol Myrzabosynov.
Vedomstvo basşysy kommersiialandyru klubtyŋ qarjylyq tūraqtylyǧyn arttyryp, käsıbi menedjmenttı damytuǧa jäne sporttyq nätijelerdı jaqsartuǧa mümkındık beretının atap öttı.
Äleumettık jelıde bırneşe avtor käsıpker Aidyn Rahymbaidyŋ klubtyŋ damuyna investisiia saluǧa kelısıp, zamanaui futbol akademiiasyn saludy josparlap otyrǧany turaly jarysa jazǧan. Sonymen qatar, klubty ūstauǧa jäne infraqūrylymdy damytuǧa qarjy bölınbek.
Būdan bölek, BAQ mälımetınşe, «Samūryq-Qazyna» qory 2026 jylǧa arnalǧan biudjetten klubqa bırneşe milliard teŋge baǧyttaudy közdep otyr. Būl qarajat «Astananyŋ» Qazaqstan Premer-ligasynda chempiondyqqa talasuyna mümkındık beredı.
