Ǧylym jäne joǧary bılım ministrlıgınıŋ Joǧary jäne joǧary oqu ornynan keiıngı bılım komitetı Ūlttyq bıryŋǧai testıleudı (ŪBT) jetıldıru baǧytynda atqarylyp jatqan jūmystar turaly mälımet berdı, dep habarlaidy "Adyrna" ūlttyq portaly.
Vedomstvonyŋ mälımetınşe, Qazaqstandyq ŪBT-ny ädısnamasy men sapasy joǧary halyqaralyq testıleu jüiesıne ainaldyru maqsatynda arnaiy jūmys toby qūrylǧan. Onyŋ aiasynda Educational Testing Service (ETS) halyqaralyq testologiialyq kompaniiasynda oqytu üşın äzırleuşıler men sarapşylardyŋ tızımın daiyndau, ŪBT-ny kezeŋ-kezeŋımen jetıldıruge arnalǧan bes jyldyq jospar äzırleu jäne ETS-pen bırlesıp test formatyn jaŋǧyrtudyŋ ädısnamasyn jasau közdelıp otyr.
Alaida 2026 jyly ŪBT formatyna özgerıs engızu josparlanbaǧan.
"Barlyq özgerıs ǧylymi tūrǧyda zerdelenıp, şeteldık jäne otandyq täjıribelı maman-sarapşylardyŋ qatysuymen mūqiiat talqylanady. Bılımdı baǧalau jüiesındegı jaŋaşyldyqtardyŋ maŋyzy men nätijelerı qoǧamǧa jan-jaqty tüsındırıletın bolady", – delıngen vedomstvonyŋ jauabynda.
Eske salaiyq, būǧan deiın QR Ǧylym jäne joǧary bılım ministrlıgı men ETS bılım beru jäne talanttardy damytu salasyndaǧy halyqaralyq ūiymy ŪBT-ny transformasiialauǧa baǧyttalǧan strategiialyq ärıptestıktı bastaitynyn mälımdegen edı.
