Qazaqstan men İran aldaǧy uaqytta halyqaralyq ūiymdar aiasynda özara yqpaldastyǧyn jalǧastyra beredı, dep habarlaidy "Adyrna" ūlttyq portaly Aqordaǧa sıltep.
Būl turaly İran İslam Respublikasynyŋ prezidentı Masud Pezeşkianmen kelıssözder qorytyndysyna orai ötken baspasöz mäslihatynda Memleket basşysy Qasym-Jomart Toqaev mälımdedı.
Prezidenttıŋ aituynşa, ekı el arasyndaǧy mädeni-gumanitarlyq bailanys ärdaiym özara qarym-qatynastyŋ altyn köpırı bolyp sanalady.
«İran mūraǧattarynda saqtalǧan qazaq tarihyna qatysty bırqatar köne qoljazbanyŋ köşırmesın äkelgen eken. Onda 18 ǧasyrdaǧy ūlt şejıresı men mädenietıne qatysty qūndy derekter bar», — dedı Qasym-Jomart Toqaev.
Memleket basşysy būl qūjattar qazaq ǧalymdaryna Qazaq handyǧynyŋ sol kezeŋdegı halyqaralyq qatynastaryn tereŋ zertteuge mümkındık beretının atap öttı.
«Osy rette Mädeniet jäne aqparat ministrlıgıne İrannyŋ tiıstı mekemelerımen bırlesıp, elımızde köne qoljazbalar körmesın ūiymdastyrudy tapsyrdym. Sonymen bırge bız iran tarapymen bırlesıp, qazaq jerınde ūly oişyl Äbu Nasyr äl-Farabi mūrasyna arnalǧan tarihi-mädeni keşen salu jönınde kelısımge keldık. Bügın bılım jäne ǧylym salasyndaǧy yntymaqtastyqty küşeitu joldary da talqylandy. Ekı eldıŋ medisina qyzmetkerlerı özara täjıribe almasyp, bılıktılıgın arttyru baǧytynda jūmys jürgızetın bolady», — dedı Prezident.
Qasym-Jomart Toqaev kelıssözder barysynda halyqaralyq ahual da talqylanǧanyn aitty.
«Qaruly qaqtyǧystardyŋ, sanksiialyq qysymdar men sauda soǧystarynyŋ küşeiuıne alaŋdauşylyq bıldırdık. Halyqaralyq ūiymdardyŋ bedelınıŋ tömendeuıne qatysty pıkır almastyq. BŪŪ rölın küşeitu, onyŋ qararlary men jarǧylaryn qataŋ saqtau, halyqaralyq qūqyq qaǧidattaryn ılgerıletu jäne ädıldıkke berık bolu turaly ortaq ūstanymǧa keldık. Barlyq janjaldardy diplomatiialyq kelıssözder arqyly beibıt jolmen şeşu qajet ekenın atap öttık», — dedı Memleket basşysy.
Onyŋ aituynşa, Qazaqstan men İrannyŋ keŋeitılgen serıktestıgın nyǧaitu ekı el halyqtarynyŋ müddesıne sai keledı.
«Bügıngı kelıssözder nätijelı boldy deuge tolyq negız bar. Ekı eldıŋ dostyǧy mäŋgı bolsyn», — dedı Qasym-Jomart Toqaev.
Aita keteiık, būǧan deiın Prezident Aqordada resmi saparmen kelgen İran İslam Respublikasynyŋ Prezidentı Masud Pezeşkiandy qarsy alǧan bolatyn. Keiın taraptar şaǧyn qūramda kelıssöz ötkızıp, qorytyndy boiynşa Bırlesken mälımdeme qabyldap, 8 qūjatqa qol qoidy.
