Qazaqstan men Europalyq Odaq arasyndaǧy Keŋeitılgen ärıptestık pen yntymaqtastyq turaly kelısımge qol qoiylǧanyna 10 jyl toldy, dep habarlaidy "Adyrna" ūlttyq portaly.
Osy kezeŋde taraptar arasyndaǧy qarym-qatynas keŋ auqymdy ärı serpındı strategiialyq serıktestık deŋgeiıne köterıldı. Būl turaly Europalyq keŋes prezidentı Antoniu Koşta Egemen Qazaqstan basylymynda jaryq körgen maqalasynda mälımdedı.
Onyŋ aituynşa, bügınde Qazaqstan men EO arasyndaǧy yntymaqtastyq saiasi dialogty, qauıpsızdık pen ekonomikalyq damudy, köpjaqty diplomatiiany, özara bailanystylyq pen innovasiialardy qamtidy. Geosaiasi şielenıs jaǧdaiynda Qazaqstan Europalyq Odaq üşın tūraqty, senımdı ärı perspektivaly serıktes bolyp qala beredı.
Köpjaqty formattaǧy özara ıs-qimyl BŪŪ Jarǧysy qaǧidattaryn saqtau, beibıt şeşımderdı ılgerıletu jäne halyqaralyq qūqyqqa negızdelgen tärtıptı nyǧaituǧa baǧyttalǧan. Ukrainadaǧy qaqtyǧysty toqtatyp, tūraqty beibıtşılık ornatu Qazaqstan men EO-tyŋ ortaq basymdyǧy retınde atap ötıldı.
Serıkteste naqty nätijeler bergen baǧyttardyŋ bırı — kölık özara bailanystylyǧy. Transkaspii halyqaralyq kölık dälızı («Orta dälız») Ortalyq Aziia men Europa arasyndaǧy strategiialyq maŋyzdy köpırge ainaldy. Būl baǧytqa 10 mlrd eurodan astam europalyq jäne halyqaralyq investisiia tartylyp, dälızdıŋ tiımdılıgı men sifrlandyryluy artty.
Ekonomikalyq yntymaqtastyq ta ekıjaqty qatynastyŋ negızgı tıregıne jatady. Qazırgı taŋda Qazaqstanda 4 myŋnan astam europalyq kompaniia jūmys ısteidı. «Horizon Europe» jäne «Erasmus+» baǧdarlamalary aiasyndaǧy jobalar, sondai-aq vizalyq rejimdı jeŋıldetu jönındegı kelıssözder ıskerlık jäne akademiialyq bailanystardy keŋeituge yqpal etude.
Strategiialyq ärıptestıktıŋ maŋyzdy salalarynyŋ bırı – asa maŋyzdy şikızat, energiia resurstary, «jasyl» tehnologiialardy jetkızu. Şikızat, akkumuliator batareialary jäne jasyl sutek öndırısı boiynşa bekıtılgen bırlesken jol kartasy (2025–2026 jj.) osy baǧyttaǧy yntymaqtastyqtyŋ äleuetın ıske asyruǧa negız bolmaq.
Antoniu Koştanyŋ aituynşa, kelesı onjyldyqta qosylǧan qūn tızbekterın damytu, infraqūrylymdy jaŋǧyrtu, tehnologiialyq yntymaqtastyqty tereŋdetu jäne naqty bırlesken jobalardy jüzege asyru basty mındetke ainalady.
«Qazaqstan – senımdı serıktes. Bırge bız ortaq qiyndyqtardy ortaq artyqşylyqtarǧa ainaldyryp, ekı tarap üşın de qauıpsız, tūraqty jäne bäsekege qabılettı bolaşaq qalyptastyra alamyz», – dep atap öttı Europalyq keŋes prezidentı.
