Memleket basşysy Qasym-Jomart Toqaev öŋırlık jük aviahabtaryn damytu jönınde keŋes ötkızdı. Būl turaly bügın, 3 jeltoqsanda Aqordanyŋ baspasöz qyzmetı jazdy, dep habarlaidy «Adyrna» tılşısı.
Prezident aviahabtardy damytu kölık-tasymal salasyndaǧy basym baǧyttardyŋ bırı sanalatynyna toqtaldy.
«Küllı älem elderı tranzittık mümkındıkterın arttyruǧa erekşe män berıp otyr. Halyqaralyq bäsekelestık küşeie tüstı. Qazır Qazaqstan arqyly jöneltıletın jük, negızınen, avtomobil jäne temırjol arqyly tasymaldanady. Bıraq sarapşylar jyl ötken saiyn äue joldary arqyly ötetın jük tasymaly, iaǧni «air cargo»-nyŋ ülesı arta tüsedı degen boljam jasauda. 2040 jylǧa qarai äue jükterınıŋ 20 paiyzy «Aziia – Europa» baǧytyna tiesılı bolmaq. Elımız temırjoldy, avtokölık jolyn jäne äue tasymalyn qamtityn multimodaldı logistika jüiesın qalyptastyruy kerek»,-dedı ol.
Memleket basşysynyŋ pıkırınşe, negızgı äuejailarda tolyqqandy aviahab qalyptastyru – öte özektı mäsele.
«Är äuejaidyŋ bäsekege qabılettı tūstaryn aiqyndap, jūmys täsılın tübegeilı özgertu kerek. Qazır tranzittık kargo-trafiktıŋ qosymşa qūny tömen bolyp tūr. Jük tasymaldauşylar köbıne janarmai qūiu nemese tehnikalyq qajettılık üşın ǧana toqtaidy. Bızdıŋ äuejailar jüktı tiep-jöneltuge, jinaqtauǧa asa qūlyqty emes. Sebebı elımızde infraqūrylym daiyn emes. Sonyŋ saldarynan tranzittık äleuetımızdı tolyq paidalana almai otyrmyz. Osyǧan orai arnaiy ekonomikalyq aimaqtardyŋ tiımdı jūmysyn qamtamasyz etuımız kerek. Ūsynylatyn jeŋıldıkter ärbır habtyŋ erekşelıgıne qarai jasaluǧa tiıs»,- dedı Qasym-Jomart Toqaev.
Odan bölek, prezident qordalanǧan mäselelerdı şeşudı keiınge qaldyryp, tiıstı qūjat qabyldamai otyrǧan salalyq ministrlıktıŋ jūmysyn synǧa aldy.
Memleket basşysy Ükımetke äue habtaryn damytudyŋ naqty mäselelerın şūǧyl türde şeşu jönınde tapsyrma berdı.
«Äuejai qyzmetındegı qazırgı tarif saiasatyn qaita qarauǧa basa män beru kerek. Soŋǧy 10 jylda baǧa bır-aq ret, iaǧni biyl ǧana östı. Tarifterdı ūstap tūru infraqūrylymnyŋ tozuyna äkeledı. Mūny täjıribe anyq körsettı. Baǧany qaita qarau qalyptasqan jaǧdaidy özgertuge kepıl boluǧa tiıs. Sonymen qatar baǧanyŋ kürt köterıluın boldyrmau üşın oŋtailandyrylǧan täsıl qoldanu qajet. «Tariftı investisiiaǧa aiyrbastau» qaǧidatyn engızu aldaǧy jyldary salany damytudyŋ negızgı şarty boluy kerek. Qolaily ıskerlık orta qūru – strategiialyq mındet. İnvestorlardy mūqiiat tyŋdaǧan jön. Äuejailardaǧy aviasiialyq emes qyzmettı şekten tys retteu köptegen tüitkıl tuyndatyp otyr. Konkurstar arqyly kompaniialardy ırıkteu barysynda biurokratiialyq kedergı jasaudy, kelısımderdıŋ merzımın şekteudı toqtatu kerek»,- dep tolyqtyrdy ol.
