Mäjılıs deputaty Abzal Qūspan medisina qyzmetkerlerıne qoqan-loqy körsetu äreketterın qylmys qataryna engızu mäselesıne bailanysty ışkı ıster ministrlıgıne deputattyq saual joldady, dep habarlaidy “Adyrna” ūlttyq portaly.
Deputattyŋ aituynşa, kei jaǧdaida azamattardyŋ aşuǧa berıluıne türlı sebep boluy mümkın.
«Därıgerlerge “küş körsetemın” dep qorqytudy qylmys qataryna jatqyzyp otyrsyzdar. Türlı jaǧdai bolady: bırı – jaqynynan aiyrylyp qalady, bırı – dūrys medisinalyq qyzmet ala almaidy. Memlekettık te, jekemenşık te mekemeler bar. Adam tıs emhanasyna barady, bıraq sapaly qyzmet körsetılmeidı. Soǧan orai aşuly sözder aityluy mümkın. Sonyŋ bärın qylmys dep tanyp otyrsyzdar. Erteŋ praktikada qylmystar sany kürt artyp ketedı dep oilamaisyz ba?» – dedı Abzal Qūspan.
Saualǧa ışkı ıster ministrınıŋ orynbasary Sanjar Ädılov jauap berdı.
Onyŋ aituynşa, qoqan-loqy äreketı qylmys dep tanyluy üşın naqty qauıp tudyruy kerek.
«Qylmystyq prosestıŋ ūstanymdaryna kelsek, eŋ bastysy – qorqytu äreketınıŋ adam üşın şynaiy qauıp tudyruy. Eger adam qolyna pyşaq ūstap, “ūramyn” dese, būl – basqa bap boiynşa qaralatyn jaǧdai. Al jai söz arqyly aitylǧan qorqytu bolsa, oǧan basqaşa qūqyqtyq baǧa berıledı. Mümkın, qylmystyq ıs qozǧalmai, basqa şeşım qabyldanuy mümkın», – dedı vise-ministr Ädılov.
