Almaty qalasy Işkı saiasat basqarmasynyŋ qoldauymen «Social project management» ortalyǧy Prezident Qasym-Jomart Toqaevtyŋ 2025 jyly halyqqa arnaǧan Joldauynda atap körsetılgen «Zaŋ jäne tärtıp» qaǧidatyn ornyqtyru maqsatynda «Bas bostandyǧynan aiyru oryndarynan şyqqan adamdardy äleumettık beiımdeudegı özektı mäseleler» atty döŋgelek üstel ötkızdı.
Döŋgelek üstelge Almaty qalasy Qylmystyq-atqaru jüiesı departamentınıŋ, Eŋbek mobildılıgı ortalyǧynyŋ ökılderı, jūmys beruşıler, zaŋgerler, qūqyqtanuşylar, psihologtar, jastar qatysty.
Döŋgelek üstel ūiymdastyruşy ärı joba jetekşısı Beibıt Moldahmetūlynyŋ kırıspe sözınen bastaldy. Ol üş jylǧa sozylǧan joba aiasynda atqarylǧan jūmystarǧa toqtalyp, jobaǧa belsendı atsalysqan barlyq qatysuşylarǧa alǧys aitty. «Joba aiasynda biyl 40-tan astam adamǧa qūqyqtyq kömek körsetıldı. Türmelerde psihologiialyq treningter ötıp, 120-dan astam adam qamtyldy. Jūmys beruşılerdı şaqyryp, abaqtydan şyqqandarmen kezdestırdık» dedı ol.
Kelesı söz kezegı qaladaǧy tüzeu mekemelerınde psihologiialyq treningter ötkızgen Gülbanum Muradullaevaǧa tidı. Onyŋ aituynşa sottalǧandar türmeden şyqqan soŋ qaitadan qylmysqa ūrynyp, türmege taǧy tüsemız be dep alaŋdaidy eken. «Är adamda ışkı tırek bolady. Ol jastyq şaqta qalyptasady. Jazasyn ötep jatqandarda osy ışkı tırek qalyptaspaǧan. Men olarǧa sondai ışkı tırek tauyp beruge tyrystym» deidı G.Muradullaeva.
Almaty qalasy QAJ departamentı jobanyŋ ūiymdastyruşylardyŋ basty serıktesı boldy. Osy departamenttıŋ probasiia qyzmetınıŋ basşysy, ädılet maiory Mirlan Aqsaqalov jobanyŋ ömırşeŋdıgıne nazar audaryp, joba kelesı jyly da jalǧassa eken dep niet bıldırdı. Sonymen qatar ol Memleket basşysy Qasym-Jomart Toqaevtyŋ «Zaŋ jäne tärtıp» qaǧidatyna toqtaldy. «Qoǧam jaqsy ömır süru üşın bırınşı kezekte zaŋ üstemdık etu kerek. Sosyn zaŋnyŋ üstemdıgın, iaǧni tärtıptı qamtamasyz etetın qūzyrly mekemeler tiımdı jūmys ısteuı tiıs» dep atap öttı ädılet maiory.
Al qūqyqtanuşy Qalbubi Janbotaevanyŋ sözınşe sottalǧandarǧa qūqyqtyq kömek körsetu ūzaq prosestı qamtidy eken. «Aryz, ötınıştermen qatar jäbırlenuşı, aiyptauşy taraptardyŋ hattaryn jinap, sotqa jıberemız. Sot olardyŋ keibırın qanaǧattandyrady, keibırın qanaǧanttandyrmaidy. Kerek deseŋıŋ ne üşın qanaǧattandyrmaǧanyna tüsınıkteme de bermeidı. Sol sebeptı qūjattardy jinap alty aidan keiın sotqa qaitadan aryz-ötınış ötkızuge mäjbürmız» degen qūqyqtanuşy, probasiia qyzmetkerlerınıŋ jūmystaryna da män berıp, olardyŋ eŋbekaqylary az ekenın tılge tiek ettı. Türmeden şyqqandardyŋ ısımen ainalysatyn mamandardyŋ ailyǧy joǧary bolu kerektıgın aity.
«Kazmontaj» JŞS bas injenerı Ūlan Mekebaev jobaǧa belsendı qatysqan jūmys beruşılerdıŋ bırı. Ol bas bostandyǧynan aiyru oryndarynan şyqqan adamdarmen tıkelei äŋgımelesu jürgızgen maman. «Bızge elektr symyn tartuşy, montaj jasauşy mamandar kerek. Ailyq 300 myŋ teŋgeden bastalady. Türmeden şyqqan bırneşe azamatty jūmysqa şaqyrdym. Bıraq olar jūmysty köpsınıp, ailyqty azsyndy» dedı jūmys ūsynuşy kompaniianyŋ ökılı.
Döŋgelek üstel soŋynda söz alǧan qūqyqtanuşy Baqyt Aqyşev jobanyŋ maŋyzyna toqtaldy. «Būl oŋai joba emes. Türmeden şyqqandar bylai tūrsyn universitet bıtırgenderge jūmys tauyp beru qiyn qazır. Är jūmys beruşınıŋ aldyna baryp, kezdesuge şaqyru da energiiany talyp etedı. Men özım bıraz jyl qūqyq qorǧau salasynda ıstegen adammyn. Bızdıŋ kezımızde ıstı bolǧandarmen jūmys jürgızu uchaskelık polisiialarǧa tapsyrylatyn. Qazır olar üşın probasiia qyzmetı aşylyp, poliseilerge tüsetın jüktemeler jeŋıldedı» dep qorytyndylady ol.
