3 qaraşada monitoring nätijesınde 112 itbalyqtyŋ öleksesı anyqtaldy, dep habarlaidy "Adyrna" ūlttyq portaly QazAqparatqa sıltep.
Jaiyq–Kaspii oblysaralyq basseindık balyq şaruaşylyǧy inspeksiiasynyŋ qyzmetkerlerı Maŋǧystau oblysy, Tüpqaraǧan audany aumaǧyndaǧy Kaspii teŋızı jaǧalauynda monitoring jürgızu kezınde itbalyqtardyŋ öleksesın tapqan.
Gidrobiologiia jäne ekologiia institutynyŋ habarlauynşa, itbalyqtardyŋ ölekselerı äbden şırıp ketken. Aldyn ala boljam boiynşa, januarlar şamamen bır ai būryn qyrylǧan boluy mümkın. Dauyldy jeldıŋ äserınen ölekseler endı ǧana Tüpqaraǧan jaǧalauyna şyǧyp qalǧan.
Mamandar itbalyqtardyŋ qyryluyna immunitettıŋ älsıreuı jäne infeksiialyq aurularǧa beiımdelgıştıktıŋ artuy sebep boluy yqtimal ekenın aitady.
«Baǧdarlamalyq-nysanaly qarjylandyru şeŋberınde Kaspii itbalyǧyn zertteumen ainalysatyn ǧylymi ūiym mamandary itbalyq ölekselerınen synama alyp, zertteu jürgızıp jatyr», — delıngen instituttyŋ habarlamasynda.
Barlyq ölekseler sanitarlyq talaptarǧa sai jinalyp, joiylǧany turaly aqparat tarady. Qazır Kaspii teŋızı jaǧalauyn baqylau jäne zertteu jūmystary jalǧasuda.
