Abai oblysynda äielder koloniiasynan alaiaqtyq üşın jazasyn ötegen 26 jastaǧy äiel bostandyqqa şyqty. Koloniia qaqpasynda ony Jetısu oblysynan arnaiy kelgen süiıktı jary kütıp aldy. Būl turaly Polisia.kz jazdy, dep habarlaidy "Adyrna".
Aqparatqa säikes, sot ükımımen äielge bes jyl bas bostandyǧynan aiyru jazasy kesılgen bolatyn. Jazasyn öteu kezınde ol mekemede aspazdyŋ kömekşısı bolyp eŋbek etıp, özıne tapsyrylǧan jūmystardy ūqyptylyqpen oryndap, eŋbekqor ärı jauapty qyzmetker retınde tanyldy.
Erlı-zaiyptylardyŋ jüzdesuı jürek tebırenterlık äser qaldyrdy – olar quanyştyŋ köz jasyn tyia almai, bır-bırın qūşaǧynan ūzaq uaqyt bosata almady. Būl – tek er men äieldıŋ kezdesu sätı ǧana emes, ananyŋ öz üiıne, otbasyna, ömırınıŋ mänıne qaita oraluy edı.
Bostandyqqa şyqqan äiel mekeme äkımşılıgıne qoldau men tüsınıstık tanytqandary, sondai-aq qiyn künderde eŋbek etıp, ruhani küş tabuǧa mümkındık jasaǧandary üşın alǧysyn bıldırdı.
«Eŋ bastysy – jaqyndarymnyŋ qasymda boluy. Men osy sättı kün saiyn armandadym. Sottalǧanǧa deiın makiiaj suretşısı bolyp jūmys ıstedım, endı süiıktı ısıme qaita oralǧym keledı. Adamdardy ädemı etıp, olarǧa quanyş syilau – menıŋ ömırlık maqsatym. Ärine, jastyqtyŋ eŋ jaqsy jyldary türme qabyrǧasynda öttı, bıraq būl ömırlık sabaq maǧan köp närse üirettı. Endıgı bar armanym — balalarym men otbasym üşın jaŋa ömır bastau», – dep bölıstı ol şynaiy sezımın.
№23 mekeme äkımşılıgı äielderdıŋ qoǧamǧa beiımdeluıne erekşe män beretının atap öttı.
«Bız sottalǧandardy tek jazasyn öteu kezınde ǧana emes, bostandyqqa şyǧuǧa daiyndyq kezeŋınde de qoldauǧa tyrysamyz. Olarǧa eŋbek etuge, jaŋa daǧdylar men mamandyqtardy meŋgeruge jaǧdai jasaimyz. Basty maqsatymyz — olardyŋ erkındıkke şyqqannan keiın ömırın jaŋa paraqtan bastap, ötken qatelıkterın qaitalamauy», – dedı mekeme bastyǧynyŋ orynbasary Anar Sabieva.
