Búgin Májilis depýtaty, ekonomıst Dáýlet Muqaevtyń bastamasymen Dauletten qaıyrymdylyq qory Abaı oblysyna jol júrip, órtten zardap shekkenderge jáne órt sóndirýshilerge kómek kórsetti, dep habarlaıdy “Adyrna” ulttyq portaly.
Kerek zattar tizimin jasap, qajetti zattardy satyp aldyq. Halyqtyń birligi osyndaı ıgi iste bilinedi. Apaılar órt sóndirýshilerge as daıyndap, tileýin tileýde. Eriktiler qoldan kelgen kómekti jasaýda.
Biz de órt oshaqtaryna baryp, tilsiz jaýmen kúresip júrgen azamattarǵa jeke gıgıenalyq zattar (qolǵap, náskı jáne t.b.) jáne azyq-túlik sebetterin jetkizdik. Jıyny 300-den asa adamǵa tamaq apardyq. Áli de osynda bolyp, qolymyzdan kelgenshe kómek beremiz. Bastysy - elimiz aman, jurtymyz tynysh bolsyn! Orman alqabyndaǵy órt seıilip, órt sóndirýshiler, áskerı qyzmetkerler jaqyn arada úılerine aman-esen oralýǵa jazsyn!,- dedi Dauletten qaıyrymdylyq qory.
