Türkıstan qalasynda tolyq jaŋǧyrtudan ötken «Parasat» saiabaǧy jūrtşylyqqa esıgın aşty. Saltanatty şaraǧa arnaiy qatysqan Türkıstan oblysynyŋ äkımı Nūralhan Köşerov köpşılıktı qūttyqtap, jyly lebızın bıldırdı.
– Aldymen, barşaŋyzdy kele jatqan Respublika künımen şyn jürekten qūttyqtaimyn! Elımızdegı eŋ ūlyq mereke qarsaŋynda Türkıstanda taǧy bır quanyşty sätte jolyǧyp tūrmyz. Biyl Memleket basşysynyŋ bastamasymen Türkıstan qalasynyŋ erekşe märtebesı turaly zaŋ qabyldandy. Osy Zaŋ aiasynda Türkıstanǧa qoldau küşeitılıp, şahardyŋ turistık äleuetı artuda. Sonyŋ aiqyn körınısı – jaŋarǧan «Parasat» saiabaǧy. Atalǧan saiabaqty qaita rekonstruksiialau jūmystary 2023 jyly bastalyp, bügınde tolyq jaŋartylyp, el igılıgıne berılıp otyr. Jaŋarǧan saiabaq qala tūrǧyndary men qonaqtaryna sapaly qyzmet körsete bersın! – degen oblys basşysy halyqqa qolaily orta jasau baǧytyndaǧy jūmystar öz jalǧasyn tabatynyn jetkızdı.
Nūralhan Oralbaiūly saiabaqtaǧy futbol alaŋşasynda jasöspırımdermen kezdesıp, jas sportşylarǧa doptar tabystady. Saiabaq aumaǧyn aralap kördı.
«Parasat» saiabaǧyn rekonstruksiialau jūmystaryn Türkıstan qalasy äkımdıgı qūrylys bölımınıŋ tapsyrysymen «Önım» JŞS atqardy. Jalpy aumaǧy 14 gektardy qamtityn saiabaqta tūrǧyndardyŋ qauıpsız ärı jaily demalysy üşın barlyq jaǧdai jasalǧan. Mūnda 2 myŋnan astam aǧaş otyrǧyzylyp, zamanaui jaryqşamdar men 100-den astam oryndyq ornatyldy. 7 myŋ şarşy metr aumaqqa asfalt töselıp, balalarǧa arnalǧan oiyn alaŋşalary, futbol, basketbol jäne tennis alaŋdary, velojolaqtar men jaiau jürgınşılerge arnalǧan joldar, sondai-aq, jazǧy sahna men demalys aimaqtary qarastyrylǧan. Saltanatty şara konserttık baǧdarlamaǧa ūlasyp, tūrǧyndarǧa merekelık köŋıl-küi syilady.
