«AMANAT» partiiasy barlyq deŋgeidegı mäslihattardy biylǧy 1 jeltoqsanǧa deiın oŋailatylǧan deklarasiia negızınde arnaiy salyq rejimın qoldanǧan kezde korporativtık tabys salyǧynyŋ nemese jeke tabys salyǧynyŋ mölşerlemesın tömendetu turaly şeşım qabyldauǧa şaqyrady. Bügınde 27 audan men qalada salyq 2-3%-ǧa deiın tömendetıldı. Partiialastardyŋ pıkırınşe, būl şara şaǧyn jäne orta biznestıŋ fiskaldyq jüktemesın jeŋıldetuge mümkındık beredı.
Türlı deŋgeidegı mäslihattardaǧy «AMANAT» partiiasy deputattyq korpusynyŋ atqarǧan jūmys nätijesı «AMANAT» partiiasynyŋ Hatşysy Eldar Jūmaǧazievtıŋ töraǧalyǧymen ötken keŋeste qaraldy. Oǧan öŋırlerdegı mäslihattardyŋ töraǧalary qatysty. Qatysuşylar partiianyŋ sailaualdy uädelerın oryndau, käsıpkerlerge qoldau körsetu mäselelerın, sondai-aq biznes qauymdastyǧynyŋ jaŋa Salyq kodeksı boiynşa jūmysqa daiyndyq deŋgeiın talqylady.
Is-şarany aşqan Eldar Jūmaǧaziev aldaǧy jyly partiia bizneske barynşa qoldau körsetuge, memlekettık şeşımderdıŋ aşyqtyǧyn qamtamasyz etuge, käsıpkerlerdıŋ, äsırese şaǧyn jäne orta biznes ielerınıŋ müddelerın eskeruge tiıs ekenın atap öttı. Kelesı jyly 1 qaŋtardan bastap küşıne enetın jaŋa Salyq kodeksıne (JSK) säikes, oŋailatylǧan deklarasiia negızınde arnaiy salyq rejimınıŋ mölşerlemesın tömendetu nemese arttyru turaly şeşımdı mäslihattar qabyldaidy jäne atalǧan mäsele biyl 1 jeltoqsanǧa deiın tolyq şeşıluge tiıs. Ol bırqatar öŋırde talqylau jūmysy aiaqtalǧanyn jäne keibır mäslihattar şaǧyn jäne orta biznestıŋ müddelerın eskere otyryp, tömen mölşerlemelerdı bekıtkenın atap öttı.
«Jaŋa salyq jüiesı aiasynda şaǧyn jäne orta biznes qosymşa jüktemege tap boluy mümkın. Bız bır jaǧynan biznes üşın ädıl bolatyn, sonymen bırge jergılıktı biudjetterdıŋ tūraqtylyǧyn qamtamasyz etetın şeşımder qabyldauymyz kerek. Mäslihattardyŋ mölşerlemelerdı bekıtu turaly qaulylary negızdelıp, käsıpkerlerge jetkızıluge tiıs. Mölşerlemelerge kez-kelgen özgerıs engızu äreketı mūqiiat saraptalyp, biznes-qoǧamdastyqqa jıtı tüsındırıluı kerek», – dedı partiia Hatşysy.
Mäselen, 28 qazanda Öskemen qalasynda tiıstı şeşım qabyldandy. Öskemen qalalyq mäslihatynyŋ töraǧasy Aleksandr Svetaştyŋ aituynşa, arnaiy salyq rejimı aiasynda mölşerlemenı tömendetu qadamy käsıpkerlerdı «köleŋkelı aimaqtan» şyǧuǧa jäne salyqty belgılengen tärtıppen töleuge yntalandyrady. Oblys ortalyǧynda tıptı biznes subektılerınıŋ sany artyp keledı.
Al osy jyly 17 qazanda Soltüstık Qazaqstan oblysy Aqqaiyŋ audanynda mäslihat deputattary salyq mölşerlemesın 4%-dan 3%-ǧa deiın tömendetu bastamasyna qoldau bıldırdı. Halyq qalaulylarynyŋ pıkırınşe, būl şara bolaşaqta jaŋa käsıporyndardyŋ aşyluyna yqpal etıp, nätijesınde halyqty jūmyspen qamtu deŋgeiı artady.
Būǧan qosa, Atyrau qalasynda, Atyrau oblysyna qarasty Mahambet jäne Jylyoi audandarynda, sondai-aq Aqmola oblysynyŋ Jaqsy audanynan basqa barlyq audanynda 2% tömendetılgen mölşerleme bekıtıldı.
Keŋes barysynda öŋırlerdegı partiia filialdary janyndaǧy käsıpkerlık mäselelerı boiynşa üilestıru keŋesterınıŋ jūmysyn ūiymdastyru qadamdary da talqylandy. Eldar Jūmaǧaziev bügınde biznestı tolǧandyrǧan tüitkıldı mäselelerdıŋ tızımın qūru jūmysyn aiaqtaudyŋ maŋyzy zor ekenın atap öttı.
«Bızdıŋ mındetımız – jiyndardy formaldy türde ötkızu emes, biznestı tolǧandyrǧan özektı mäselelerdı anyqtau, olardy jergılıktı jäne ortalyq memlekettık organdarǧa jetkızu, mäselenı jergılıktı jerde şeşu jūmysyn qamtamasyz etu. Käsıpkerler partiia qoldauyn sezınuı kerek. Bız olarǧa jobalaryn jüzege asyruǧa jäne biznes tūraqtylyǧyn saqtap qaluǧa mümkındık beruımız kerek. Būl qadam, äsırese salyq zaŋnamasy özgergen tūsta asa maŋyzdy», – dep tüiındedı partiia Hatşysy.
Aita keteiık, elımızdegı 8 oblysta ornalasqan 27 audan men qalada oŋailatylǧan deklarasiia negızınde jaŋa arnaiy salyq rejimı üşın mölşerlemenı tömendetu turaly şeşım qabyldandy. Sonymen qatar, taǧy 60 audanda mölşerleme tömendeuı kütılude.
