Prezident Qasym-Jomart Toqaev New Silk Way VII Halyqaralyq kölık-logistika biznes-forumynyŋ aşylu räsımınde söz söiledı, dep habarlaidy "Adyrna" ūlttyq portaly Aqordaǧa sıltep.
Memleket basşysy Qazaqstandaǧy jaŋa strategiialyq infraqūrylymdyq jobanyŋ ıske qosylǧanyn mälımdedı.
Prezident forum qatysuşylaryna Dostyq – Moiynty temırjolynyŋ ekınşı jelısınıŋ resmi aşyluymen qūttyqtau joldap, onyŋ elımızdıŋ kölık-logistika salasy üşın maŋyzyn atap öttı.
«Dostyq – Moiynty joly — şyn mänınde asa maŋyzdy joba. Ol Qazaqstannyŋ kölık-logistika jüiesınıŋ tiımdılıgın arttyryp, halyqaralyq bailanysty nyǧaituǧa serpın beredı. Jaŋa jol jük tasymalynyŋ kölemın bes ese arttyryp, eksporttyq tauarlardy jetkızu uaqytyn qysqartady. Sonymen qatar elımızdıŋ tranzittık äleuetın küşeitedı, – dedı Memleket basşysy.
Prezidenttıŋ aituynşa, üş jylǧa juyq uaqyt boiy jürgızılgen qarqyndy jūmys nätijesınde joba merzımınen būryn ıske qosyldy. Būl – täuelsızdık jyldaryndaǧy eŋ ırı temırjol qūrylystarynyŋ bırı sanalady.
Memleket basşysy eldıŋ bügınde Euraziiadaǧy basty tranzit habynyŋ bırıne ainalǧanyn, el aumaǧy arqyly älemnıŋ eŋ ırı sauda naryqtaryna jol aşatyn 5 temırjol dälızı ötetının atap öttı.
"Soŋǧy on jylda kölık-logistika salasyna 35 milliard dollar investisiia qūiyldy. Aldaǧy uaqytta 5 myŋ şaqyrym jaŋa temırjol salu, 11 myŋ şaqyrym joldy jöndeu josparlanǧan. Moiynty – Qyzyljar temırjoly men Transkaspii baǧytyndaǧy uchaskelerdı jaŋǧyrtu jūmystary jürgızılude. Būl şaralar Qazaqstandy Europa men Aziia arasyndaǧy maŋyzdy köpır retınde bekemdei tüsedı", – dedı Prezident.
Sondai-aq Memleket basşysy salaǧa sifrlandyru men jasandy intellekt tehnologiialaryn engızudıŋ qajettılıgıne toqtalyp, barlyq jospardy uaqtyly oryndau basty mındet ekenın eske saldy.
