پرەزيدەنت قاسىم-جومارت توقاەۆ New Silk Way VII حالىقارالىق كولىك-لوگيستيكا بيزنەس-فورۋمىنىڭ اشىلۋ راسىمىندە ءسوز سويلەدى، دەپ حابارلايدى "ادىرنا" ۇلتتىق پورتالى اقورداعا سىلتەپ.
مەملەكەت باسشىسى قازاقستانداعى جاڭا ستراتەگيالىق ينفراقۇرىلىمدىق جوبانىڭ ىسكە قوسىلعانىن مالىمدەدى.
پرەزيدەنت فورۋم قاتىسۋشىلارىنا دوستىق – مويىنتى تەمىرجولىنىڭ ەكىنشى جەلىسىنىڭ رەسمي اشىلۋىمەن قۇتتىقتاۋ جولداپ، ونىڭ ەلىمىزدىڭ كولىك-لوگيستيكا سالاسى ءۇشىن ماڭىزىن اتاپ ءوتتى.
«دوستىق – مويىنتى جولى — شىن مانىندە اسا ماڭىزدى جوبا. ول قازاقستاننىڭ كولىك-لوگيستيكا جۇيەسىنىڭ تيىمدىلىگىن ارتتىرىپ، حالىقارالىق بايلانىستى نىعايتۋعا سەرپىن بەرەدى. جاڭا جول جۇك تاسىمالىنىڭ كولەمىن بەس ەسە ارتتىرىپ، ەكسپورتتىق تاۋارلاردى جەتكىزۋ ۋاقىتىن قىسقارتادى. سونىمەن قاتار ەلىمىزدىڭ ترانزيتتىك الەۋەتىن كۇشەيتەدى، – دەدى مەملەكەت باسشىسى.
پرەزيدەنتتىڭ ايتۋىنشا، ءۇش جىلعا جۋىق ۋاقىت بويى جۇرگىزىلگەن قارقىندى جۇمىس ناتيجەسىندە جوبا مەرزىمىنەن بۇرىن ىسكە قوسىلدى. بۇل – تاۋەلسىزدىك جىلدارىنداعى ەڭ ءىرى تەمىرجول قۇرىلىستارىنىڭ ءبىرى سانالادى.
مەملەكەت باسشىسى ەلدىڭ بۇگىندە ەۋرازياداعى باستى ترانزيت حابىنىڭ بىرىنە اينالعانىن، ەل اۋماعى ارقىلى الەمنىڭ ەڭ ءىرى ساۋدا نارىقتارىنا جول اشاتىن 5 تەمىرجول ءدالىزى وتەتىنىن اتاپ ءوتتى.
"سوڭعى ون جىلدا كولىك-لوگيستيكا سالاسىنا 35 ميلليارد دوللار ينۆەستيتسيا قۇيىلدى. الداعى ۋاقىتتا 5 مىڭ شاقىرىم جاڭا تەمىرجول سالۋ، 11 مىڭ شاقىرىم جولدى جوندەۋ جوسپارلانعان. مويىنتى – قىزىلجار تەمىرجولى مەن ترانسكاسپي باعىتىنداعى ۋچاسكەلەردى جاڭعىرتۋ جۇمىستارى جۇرگىزىلۋدە. بۇل شارالار قازاقستاندى ەۋروپا مەن ازيا اراسىنداعى ماڭىزدى كوپىر رەتىندە بەكەمدەي تۇسەدى", – دەدى پرەزيدەنت.
سونداي-اق مەملەكەت باسشىسى سالاعا تسيفرلاندىرۋ مەن جاساندى ينتەللەكت تەحنولوگيالارىن ەنگىزۋدىڭ قاجەتتىلىگىنە توقتالىپ، بارلىق جوسپاردى ۋاقتىلى ورىنداۋ باستى مىندەت ەكەنىن ەسكە سالدى.
