Qyrǧyzstannyŋ ūlttyq qauıpsızdık memlekettık komitetınde ötken jinalysta 24 qyzmetker ūstaldy, dep habarlaidy «Adyrna» tılşısı.
Olardyŋ qatarynda 7 salyq qyzmetkerı, 6 şekaraşy, fitosanitarlyq qyzmettıŋ 7 ökılı jäne kölık ministrlıgınıŋ baqylau bölımınen 4 qyzmetker bar. Şeneunıkter qyrǧyz-qazaq şekarasyndaǧy sybailas jemqorlyq shemalary üşın tūtqyndalǧan.
«Chaldovar – avtokölık baqylau-ötkızu beketınde tūraqty sybailas jemqorlyqqa qatysy bar degen küdıkten bırqatar lauazymdy tūlǧa ūstaldy»,–dep jazdy ŪQMK.
Memlekettık komitettıŋ deregınşe, atalǧan tūlǧalar şeneunıkterge zaŋsyz tauar äkeluge köz jūma qarauy üşın ünemı para berıp otyrǧan.
«Lauazymdy tūlǧalar EAEO elderınen tauarlardy zaŋsyz äkelu shemasyn qūrǧan. Būl üşın jalǧan qūjattar paidalanylǧan. Deldaldar naqty jük ielerınen kontrabandalyq tauar tielgen ärbır jük kölıgı üşın 2 myŋ AQŞ dollaryna deiın alǧan. Al memlekettık organdardyŋ şeneunıkterı syiaqy retınde 57-80 dollar kölemınde aqşa alyp otyrǧan»,—delıngen habarlamada.
