İzrail premer-ministrı Biniamin Netaniahu Gaza qalasyna auqymdy äskeri operasiianyŋ bastalǧanyn rastady, dep habarlaidy "Adyrna" ūlttyq portaly.
«Bız Gazada quatty operasiiany bastadyq», – dedı ol sybailas jemqorlyq ısı boiynşa sotqa kırer aldynda.
İzrail äskerı tün boiy Gazaǧa äue soqqylaryn jasap, taŋǧy uaqytta qalaǧa qūrlyq äskerın kırgızdı. Jerusalem Post pen Axios basylymdarynyŋ habarlauynşa, İzrail maqsaty – bükıl qalany tolyq baqylauǧa alu.
Palestinalyq taraptyŋ mälımetınşe, soqqylardan qaza tapqandar men jaralanǧandar sany ösıp jatyr. İzrail tankterı qala ortalyǧyna deiın engenı de habarlandy.
İzrail armiiasynyŋ ökılı Avihai Adrai operasiia HAMAS infraqūrylymyn joiuǧa baǧyttalǧanyn mälımdedı. Äskerilerdıŋ baǧalauynşa, Gaza qalasynda şamamen 2000–3000 HAMAS jasaqşysy bar.
Qorǧanys ministrı İsrael Kas «İzrail äskerı tūtqyndardy bosatyp, HAMAS-ty tolyq talqandau üşın küresıp jatyr» dep mälımdedı.
AQŞ memlekettık hatşysy Marko Rubio İzrailge saparynda Vaşingtonnyŋ tolyq qoldauyn bıldırdı. Alaida ol operasiianyŋ «mümkındıgınşe qysqa merzımde aiaqtaluyn» qalaǧanyn jetkızdı.
İzrail bilıgı Gaza tūrǧyndaryn qaladan oŋtüstıkke köşuge şaqyrǧanymen, jüzdegen myŋ beibıt tūrǧyn älı qalada qalyp otyr. Keibırı köşuge mümkındıgı joq ekenın aitsa, basqalary oŋtüstıkte de qauıpsızdık joq dep sanaidy.
