5 qyrküiekte Halyqaralyq «Qazaq tılı» qoǧamynyŋ ūiymdastyruymen Astana qalasyndaǧy Nazarbaev universitetınde Qazaqstan halqy tılderı künı men ūlt ūstazy Ahmet Baitūrsynūlynyŋ tuǧan künıne arnalǧan «Qazaq tılı – ǧylym men tehnologiia tılı» taqyrybynda respublikalyq konferensiia öttı.
Konferensiiaǧa QR Ǧylym jäne joǧary bılım ministrı Saiasat Nūrbek, QR Sifrlyq damu, innovasiialar jäne aeroǧaryş önerkäsıbı ministrı Jaslan Madiev, «Qazaqtelekom» AQ basqarma töraǧasy Baǧdat Musin, Şaisūltan Şaiahmetov atyndaǧy «Tıl-Qazyna» ūlttyq ǧylymi-praktikalyq ortalyǧynyŋ bas direktory Maqpal Jūmabai, sondai-aq, ǧalymdar men sarapşy mamandar qatysty. Elımızdıŋ barlyq öŋırınen tıl saiasatyna jauapty mamandar men bılım basqarmalarynyŋ ökılderı onlain formatta qosyldy.
Jiynda ǧylym, bılım, tehnologiia, tıl saiasaty jäne sifrlyq damu salalary talqylanyp, memlekettık tıldıŋ zamanaui ǧylymi-sifrlyq keŋıstıktegı orny men mümkındıkterı qarastyryldy.
Halyqaralyq «Qazaq tılı» qoǧamynyŋ prezidentı Rauan Kenjehanūly qazaq tılındegı mätındı dybysqa ainaldyruǧa arnalǧan «TTS» (Text-to-Speech) jobasyn tanystyrdy. Būl bastama qazaq tılınıŋ dybystyq qoryn jasandy intellekt ekojüiesıne engızıp, ony ǧylym men tehnologiia salasynda keŋınen qoldanuǧa mümkındık beredı. Qazaqşa dybys modelı halyqaralyq Hugging Face platformasynda jariialanady.
Konferensiia aiasynda Halyqaralyq «Qazaq tılı» qoǧamy men Şaisūltan Şaiahmetov atyndaǧy «Tıl-Qazyna» ūlttyq ǧylymi-praktikalyq ortalyǧy bırlese otyryp, «Ūlttyq diktant» jobasyn resmi türde bastady. Jobanyŋ maqsaty – jazu mädenietın damytu, sauatty jazu daǧdylaryn qalyptastyru jäne tıl arqyly ūlttyq bıregeilıktı nyǧaitu. Diktant oflain jäne onlain formatta ötkızıledı, oǧan kez kelgen azamat qatysa alady.
Konferensiianyŋ resmi bölıgı aiaqtalǧan soŋ qatysuşylardyŋ barlyǧy «Ūlttyq diktantqa» qatysty. Diktantty belgılı diktor Qymbat Dosjan jürgızdı. Diktant mätını qazaq ädebietı klassikterınıŋ şyǧarmalarynan taŋdaldy. Qatysuşylarǧa baǧa qoiylmaidy, ärkım öz sauattylyǧyn özı tekseredı.
Onlain diktantty www.til.kz platformasyndaǧy «Ūlttyq diktant» paraqşasynda kez kelgen uaqytta kez kelgen jerde jazuǧa bolady. Qatysuşylarǧa elektrondy alǧys hat pen KITAP platformasyna tegın jazylym berıledı.
«Ūlttyq diktant» qorytyndysy jyl soŋyna deiın jariialanyp, jyl saiyn dästürlı türde ötkızıledı.
