Jaŋa oqu jylynda batysqazaqstandyq bılım oşaqtary da oquşylarǧa esıkterın aiqara aşty. Bılım künınde paidalanuǧa berılgen jaŋa mektepter balalardyŋ baqytyn eselei tüskenı sözsız.
Atap aitsaq, oblysymyzǧa qarasty Kaztalov jäne Bäiterek audandarynda qos bırdei jaŋa mektep el igılıgıne berıldı. Būl turaly oblystyq bılım beru basqarmasynyŋ baspasöz qyzmetı habarlady.
Bäiterek audanyndaǧy Baiqonys auylynda Qadyr Myrza Älı atyndaǧy jalpy orta bılım beretın qazaq mektebınıŋ oquşylary men ūstazdary kezektı oqu jylyn jaŋa ǧimaratta bastady. Mekteptıŋ aşylu saltanatyna qatysqan oblys äkımı Narman Töreǧaliev oqytuşylar men şäkırtterdı, ata-analardy jaŋa oqu jylymen qūttyqtady. Ardager ūstaz Quanyş Taubai jerlesterı üşın būl oqiǧanyŋ tarihi sät ekenın jasyrmady. Su jaŋa mekteptıŋ kıltın «Antarium Group» JŞS bas direktory Erlan Atajan tabystady.
Zamanaui bılım beru talaptaryna sai tolyq jabdyqtalǧan keŋ ärı jaryq jaŋa mektepte STEM, robototehnika, vizualdy dizain, horeografiia kabinetterı, erekşe bılımdı qajet etetın balalarǧa arnalǧan sensorlyq jäne inkliuzivtı oqu bölmelerı, sport jäne akt zaldary bar.
Kaztalov audanyna qarasty Qonys auylynda paidalanuǧa berılgen jaŋa mektep 60 balaǧa arnalǧan. Bılım ordasynyŋ saltanatty aşyluyna qatysqan oblys äkımınıŋ orynbasary Qaiyrjan Meŋdıǧaliev būl igı ıstıŋ memleket, biznes jäne qoǧam arasyndaǧy tiımdı serıktestıktıŋ nätijesı ekenın atap öttı. Sebebı, būl nysan «Qaraşyǧanaq Petrolium Opereiting B.V.» kompaniiasynyŋ äleumettık jauapkerşılıgı aiasynda boi kötergen bolatyn. Sonymen qatar saltanatty şarada öŋır basşysynyŋ atynan mektep ūjymyna LED ekran syiǧa berıldı. Audan äkımı Aslanbek Sarqūlov merdıger «Smartech» JŞS direktory Jänıbek Baiǧatovqa mektep qūrylysyn sapaly jürgızıp, uaqtyly aiaqtaǧany üşın alǧys hat tabys ettı.
Ūstazdar men oquşylardy qūttyqtaǧan ardager ūstaz Jauhar Saparǧalieva būl künnıŋ tarihi maŋyzy zor ekenın aitty:
– Jaŋa mektep – bolaşaq ūrpaqqa jasalǧan zor qamqorlyq, el erteŋıne degen janaşyrlyqtyŋ jarqyn körınısı. Būl quanyşty sät tarihymyzdyŋ jarqyn betterınıŋ bırı bolary sözsız, – dedı jürekjardy lebızın jetkızgen ūlaǧatty ūstaz.
Tarihqa köz jügırtsek, Qonys auylynda alǧaşqy mekteptıŋ ırgetasy 1948 jyly salynǧan eken. Bastapqyda jetı jyldyq mektep bolyp aşylyp, är jyldary türlı qūrylymdyq özgerısterge ūşyraǧan bılım ordasy 1979-1980 oqu jylynda orta mektep bolyp qaita qūrylyp, 1980 jyly alǧaşqy tülekterın ūşyrǧan. Zaman talabyna sai jabdyqtalǧan bılım ordasynda 11 oqu kabinetı, sport zaly, ashana, kıtaphana, mäjılıs zaly qarastyrylǧan.
Qos bılım oşaǧy da Memleket basşysynyŋ üş auysymdy jäne apatty mektepterdıŋ sanyn azaitu turaly tapsyrmasyna säikes salyndy. Jalpy Batys Qazaqstan oblysynda barlyǧy 379 mektep jūmys jasaidy. Olarda 126 myŋnan astam oquşy bılım alady. Al Kaztalov audanyndaǧy 35 mektepte 5 myŋnan astam bala oqidy.
Ūqsas jaŋalyqtar
