Ashat Aımaǵambetov: Shaǵymdar óte kóp, bilim basshylary ne bitirip otyr?

11841
Adyrna.kz Telegram

BǴM-niń apparat jınalysynda mınıstr Ashat Aımaǵambetov «Muǵalim mártebesi týraly» zań buzylsa, onda qatań shara qabyldanatynyn aıtty, dep habarlaıdy "Adyrna" ulttyq portaly. 

- Shaǵymdar kóp túsip jatyr. Ár shaǵym, ótinish boıynsha tıisti sharalar da qabyldanyp jatyr. Qyzmetinen bosatý, tártiptik-ákimshilik jaýapkershilikke tartý jumystary jalǵasady. Muǵalim tek balalarǵa sabaq berýi kerek. Basqa ózine tán emes jumystarǵa tartýǵa tyıym salynady. Qaǵazbastylyqty joıý boıynsha jumys ári qaraı jalǵasady. Sondyqtan «Muǵalim mártebesi týraly» zańnyń oryndalýy boıynsha jumys júrgizile beredi, - dedi mınıstr.

Osy oraıda, mınıstr jergilikti departamentterge ákimshilik aıyppuldar, tártiptik jaýapkershilikke tartý jumystaryn jalǵastyrýdy tapsyrdy.

- Bul másele jeke baqylaýymda bolady. Eń birinshi kezekte Bilim basqarmalary, bilim bólimderinen bastaýymyz kerek. Óıtkeni ár túrli esepter boıynsha saýaldar áriptesterimizdiń deńgeıinen shyǵyp otyr. Jazda ótkizgen jalpy taldaýymyz búgin osy máseleni kórsetti. Sol sebepti aqparatty tıisti ulttyq bazadan ǵana alý kerek. Mektepterge ár túrli esepter boıynsha saýaldar joldaý zańǵa qaıshy keledi, - dep málimdedi Ashat Aımaǵambetov.

Sonymen qatar mınıstr eger zań buzylsa, onda qatań shara qabyldanatynyn aıtty.

- Aýdan deńgeıindegi bilim bólimderinde, oblys deńgeıdegi Bilim basqarlamalarynda máseleler sheshilmeı, jeke qabyldaýyma kelip, sheshilip jatqan máseleler bar. Olaı bolsa, mekteptegi dırektor, aýdandaǵy bilim bólimi basshysy, oblystaǵy Bilim basqarmasynyń basshysy ne istep otyr degen suraq týyndaıdy. Suraqtardy ár deńgeıde óz quzyrettiligi boıynsha sheshińizder, - dedi Bilim jáne ǵylym mınıstri.

Eske sala ketsek, buǵan deıin Túrkistan oblysynyń Saryaǵash aýdanynda Omarov atyndaǵy №50 mektep dırektory muǵalimderdi kýrorttyq aımaqtaǵy golf alańyn tazartýǵa jibergen bolatyn. Jaǵdaı anyqtalǵannan keıin ol qyzmetinen bosatyldy.

"Adyrna" ulttyq portaly

Pikirler