Qazaqstan Prezidentı Qasym-Jomart Toqaev elımızdegı alǧaşqy atom elektr stansiiasyna eŋ üzdık atau beru üşın baiqau ötkızudı ūsyndy, dep habarlaidy "Adyrna" ūlttyq portaly.
Būl turaly Memleket basşysy halyqaralyq pändık olimpiadalardyŋ jeŋımpazdarymen kezdesu barysynda aitty. Prezidenttıŋ aituynşa, jastardyŋ bedeldı halyqaralyq olimpiadalardaǧy jetıstıkterı halqymyzdyŋ ziiatkerlık äleuetı men ösıp kele jatqan ūrpaqtyŋ joǧary mümkındıkterın körsetedı.
«Elımızge ǧalymdar, injenerler, pedagogter, därıgerler jäne basqa da joǧary bılıktı mamandar qajet. Äsırese jasandy intellekt salasyndaǧy mamandar sūranysqa ie bolady», – dedı ol.
Prezidenttıŋ aituynşa, innovasiialar men joǧary tehnologiialar negızınde bız elımızdıŋ keleşektegı ondaǧan jyldarǧa arnalǧan berık damu ırgetasyn qalaudamyz. Sondai-aq Qasym-Jomart Toqaev üşın strategiialyq maŋyzy bar alǧaşqy atom elektr stansiiasyn «Rosatom» kompaniiasymen bırlesıp salu ısıne resmi türde kırıskenımızdı atap öttı.
«AES – būl jai ǧana energetika nysany emes, ol – ǧylymi-tehnikalyq progrestıŋ jarqyn simvoly. Äzırge būl nysannyŋ atauy joq. Öitkenı ol elımızdegı alǧaşqy nysan bolǧandyqtan, oǧan atau beru üşın jalpyūlttyq baiqau jariialauǧa bolady dep esepteimın. Sızderdı de osy baiqauǧa qatysyp, kreativtılık tanytuǧa şaqyramyn. Mümkın, sızderdıŋ ūsynystaryŋyzdyŋ bırı bız şeşım qabyldaityn kezde kädege jarar», – dedı Memleket basşysy.
