Şyǧys Qazaqstan oblysynda qūrylys jūmystary kezınde traktor tranşeiaǧa audarylyp, jürgızuşı qaza tapty, dep habarlaidy "Adyrna" ūlttyq portaly.
Oqiǧa Ūlan audanyna qarasty Bozanbai auylynda bolǧan. 1981 jyly tuǧan marqūmnyŋ artynda tört balasy qalǧany belgılı.
Qaiǧyly jaǧdaidan keiın oqiǧa ornyna Şyǧys Qazaqstan oblysynyŋ äkımı, Memlekettık eŋbek inspeksiiasynyŋ basşysy jäne Ūlan audanynyŋ äkımı barǧan.
"Mūndai jaǧdailarǧa bei-jai qarauǧa bolmaidy. Bolǧan oqiǧanyŋ naqty sebepterı anyqtaluy tiıs. Eŋbek qauıpsızdıgı – bızdıŋ sözsız basymdyǧymyz", — dedı oblys äkımı.
Oblys äkımı «TM Teplomir» JŞS-nıŋ su qūbyry jelılerın salu jūmystaryna bailanysty jan-jaqty tergeu jürgızudı tapsyrdy. Eger eŋbek qauıpsızdıgı talaptarynyŋ būzylǧany däleldense, kınälıler zaŋ aiasynda jauapqa tartylady.
Sonymen qatar, öŋır basşysy Ūlan audanynyŋ äkımıne marqūmnyŋ otbasyna barlyq qajettı kömek körsetudı mındettedı.
