Qazaqstanda "Euraziialyq qarjy kompaniiasy" (EQK) töŋıregınde şielenıs küşeiıp keledı. Būl kompaniia qūramyna "Euraziialyq bank" pen "Euraziia" saqtandyru kompaniiasy kıredı. Dauǧa Munisa Şodieva da aralasty. Şılde aiynyŋ soŋynda EQK direktorlar keŋesınıŋ müşelerı Şuhrat İbragimov pen Andrei Kopovqa qarsy jauaptyq talap-aryz berdı. Būl turaly "Sot kabinetı" portalynda jariialanǧan ıs materialdarynda jazylǧan, dep habarlaidy “Adyrna” ūlttyq portaly Kursiv basylymyna sıltep.
Būǧan deiın Şuhrat İbragimov 2025 jyldyŋ 2 mausymynda ötken direktorlar keŋesınıŋ şeşımderın zaŋdy dep tanu jäne kompaniiany sol şeşımderdı oryndauǧa mındetteu turaly talappen sotqa jügıngen bolatyn. Alaida būl şeşımderdıŋ naqty mazmūny belgısız – aşyq derekközderde būl jaiynda aqparat joq.
Endı EQK, kerısınşe, İbragimov pen Kopovtyŋ äreketterın zaŋsyz dep tanyp, direktorlar keŋesınıŋ şeşımderın jaramsyz dep tabu turaly qarsy talap qoiyp otyr.
Būǧan ūqsas talappen būǧan deiın EQK aksionerlerınıŋ bırı – Patoh Şodiev te sotqa jügıngen edı. Ol direktorlar keŋesınıŋ şeşımderın jaramsyz dep tanudy jäne kompaniiany kezekten tys aksionerler jinalysyn ötkızuge mındetteudı talap etken. Bıraq 11 şıldede sot onyŋ talaptaryn qanaǧattandyrudan bas tartty, sebebı būl kompaniia qyzmetınıŋ toqtap qaluyna äkeluı mümkın dep sanaǧan.
Qyzyǧy, būl dauǧa Şodievtıŋ qyzy Munisa da qosyldy. Ol da şılde aiynyŋ soŋynda EQK, İbragimov jäne Kopovqa qarsy talap aryz berıp, direktorlar keŋesınıŋ äreketterın zaŋsyz dep tanudy sūrady. Sot osy üş ıstı bır ıs bolyp qaralatyn etıp bırıktırdı.
Şodiev pen İbragimov arasyndaǧy kelıspeuşılıkter jyl basynan berı jalǧasyp keledı. "Kursiv" basylymynyŋ jazuynşa, Şodiev pen Maşkevich EQK-ny satudy josparlaǧan, al İbragimov būl şeşımge qarsy bolǧan. İbragimov sotqa jügınıp, kompaniia taǧdyry şeşıluı tiıs bolǧan bırneşe aksionerler jinalysyn ötkızudı toqtatyp tastaǧan.
eGov.kz mälımetınşe, "Euraziialyq qarjy kompaniiasy" marqūm Älidjan İbragimovtyŋ jary Mukadashanǧa, Patoh Şodievke jäne 2025 jylǧy 22 nauryzda qaitys bolǧan Aleksandr Maşkevichke tiesılı.
