«Jüregı toqtap qalypty» – soŋǧy jyldary eŋ köp estıletın, bıraq eŋ az zertteletın auyr sözderdıŋ bırı.
Tanys, tuys, dos-jaran arasynan bıreuınıŋ ömırden ötkenın estıgende, sol baiaǧy tanys jauap:
– Jüregı toqtap qalypty…
Osy bır söilem bügınde qalypty jaǧdaiǧa ainalyp ketkendei. Bır sätke ünsız qalamyz, «jas edı ǧoi», deimız. Jürek – adamnyŋ eŋ aiauly, eŋ näzık, eŋ maŋyzdy aǧzasy. Abai atamyz aitpaqşy, «tırı adamnyŋ jürekten aiauly jerı bola ma?» Dese de, bız däl osy aiauly jürektı jiı-jiı joǧaltyp jürmız. Nege?
Statistikaǧa köz salsaq, Qazaqstanda jürek-qan tamyrlary aurulary ölım sebepterınıŋ eŋ joǧarǧy qatarynda tūr eken.
Būryn jürek dertı 60 jastan asqan kısılerge tän bolsa, qazır būl dert 30–40 jastaǧy azamattar arasynda da jiılep otyr. Būl – halyq densaulyǧy üşın dabyl qaǧarlyq qauıptı de qaiǧyly jaǧdai.
Qoǧam retınde bız osy auyr qūbylysqa bei-jai qarap bara jatqandaimyz.
«Jüregı toqtap qalypty» degen söz bız üşın beine bır tabiǧi ajal siiaqty estıletın boldy.
Talai jannyŋ qabyrǧasyn qaiystyryp bügın ǧana aramyzdan ketıp otyrǧan belgılı jurnalist, aqköŋıl, aqjarqyn azamat Mūhtar Tümenbai da osy derttıŋ “tūzaǧyna” tüsken deidı. «Jas edı ǧoi», «jap-jaqsy-aq jürgen edı ǧoi» dep, bız otyrmyz...
Alla aldyŋnan jarylqasyn, aiauly Mūha!
