“Talai jyl ötken videoǧa bırınşı ret körgendei nege qadalyp jatyr?! Jaramsyz serial üşın aqşa qaitaru merzımı ötıp kettı me?!” dep Meruert Tüsıpbaeva Baian Alagözovaǧa jauap berdı.
Qazaqstan Respublikasynyŋ eŋbek sıŋırgen qairatkerı, änşı ärı aktrisa Meruert Tüsıpbaeva prodiuser Baian Alagözovanyŋ pıkırı men oǧan qatysty taraǧan eskı video jaily äleumettık jelıde öz pıkırın bıldırdı, dep habarlaidy “Adyrna”.
Jelı qoldanuşylary arasynda taraǧan videoǧa bailanysty Meruert hanym pıkır bıldıruge mäjbür bolǧanyn jetkızdı. Onyŋ aituynşa, būl video 5–6 jyl būryn tüsırılgen, alaida ol qazır qaitadan taralyp, jūrtşylyqtyŋ nazaryn audaruda.
“Eskı videony, sözsız, bır apym salǧyzyp otyr. Keşeden berı telefonym şyryldap, sūhbat sūrap jatqandar köp. Sol sebeptı tüsınıkteme beruge tura keldı”, — dep jazady änşı.
Meruert Tüsıpbaevanyŋ aituynşa, sol jyldary prodiuser Baian Alagözova memleket qarjysyna epostyq telehikaia tüsırgen. Alaida serial jaramsyz dep tanylyp, “Qazaqstan" Ūlttyq arnasynyŋ efirınen alynǧan.
“Sol kezde men: eger serial jaramsyz bolsa, memleket qarjysy — iaǧni, halyqtyŋ salyǧynan jinalǧan aqşa — biudjetke qaitaryluy kerek, al jobany basqa adam tüsırsın degenmın. Öitkenı däl sol kezde akter Tūŋǧyşbai Jamanqūlov ta tüsırılmei qalǧan filmı üşın memleketke aqşany qaitaryp jatqan edı”, — deidı änşı.
Meruert Tüsıpbaevanyŋ aituynşa, ol osy pıkırın bıldırgen kezde, Baian Alagözova oǧan qarsy auyr sözder aityp, jeke şekarasynan attaǧan.
“Baian: “Ol kım?! Qandai änı bar?!” degen siiaqty auyr sözder aityp, menı köpşılık aldynda qorlady. Endı qazır özı tym mädeniettı bolyp, eşteŋe bolmaǧandai keiıp tanytyp otyr”, — deidı ol.
Sondai-aq, änşı būl jaǧdaiǧa bailanysty keiınırek sūhbat berıp, öz pıkırın aşyq aitqanyn jasyrmaidy. Alaida qazır maqsatty aqparattyq şabuyl (kiberstalking) jürıp jatqanyn meŋzedı.
“Video ädeiı qiylyp taratylǧan. Sol sebeptı kei adamdar jaǧdaidyŋ anyq-qanyǧyn bılmei, “Meruert nege Baianǧa tiısıp jatyr?” dep jatyr. Şyn mänınde, men tek ädıldık talap ettım: Tūŋǧyşbai aǧa memleketke aqşany qaitardy — Baian da qaitaruy kerek degen oiymdy aittym. Būnyŋ nesı qate?!”, — dep tüiındeidı Meruert Tüsıpbaeva.
Aita keteiık, būǧan deiın Baian Alagözova Instagram jelısınde pıkır bıldırgen edı.
“Darynsyz bolǧan saiyn, kınämşıl keledı”, dep jazǧan bolatyn.
