7 şılde künı AQŞ prezidentı Donald Tramp äleumettık jelıdegı Truth Social paraqşasynda Qazaqstan prezidentı Qasym-Jomart Toqaevqa joldaǧan hatynyŋ suretın jariialady, dep habarlaidy “Adyrna”.
«Sızge būl hatty joldau men üşın ülken qūrmet. Öitkenı būl sauda qatynastarymyzdyŋ berıktıgın jäne AQŞ-tyŋ Qazaqstanmen yntymaqtastyqty jalǧastyruǧa daiyn ekenın körsetedı, tıptı ekı el arasyndaǧy aitarlyqtai sauda tapşylyǧyna qaramastan», delıngen AQŞ prezidentı qol qoiǧan, Qazaqstan prezidentınıŋ atyna joldanǧan hatta.
Tramptyŋ pıkırınşe, Qazaqstannyŋ tarifterı, tariftık emes şaralary, saiasaty jäne sauda kedergılerı tudyrǧan ūzaqmerzımdı ärı tūraqty sauda teŋgerımsızdıgın joiu qajet.
«2025 jyldyŋ 1 tamyzynan bastap bız AQŞ-qa importtalatyn barlyq qazaqstandyq tauarlarǧa 25 paiyz mölşerınde baj salyǧyn engızemız. Būl tarif salalyq tarifterden bölek esepteledı. 25% — būl bızdıŋ elder arasyndaǧy sauda teŋgerımsızdıgın joiu üşın qajet mölşerden äldeqaida az ekenın eskeruıŋızdı sūraimyn», - dep jazady Tramp.
Sonymen qatar, hatta «eger Qazaqstan nemese qazaqstandyq kompaniialar AQŞ aumaǧynda tauar öndıretın bolsa, eşqandai tarifter salynbaidy» dep naqty körsetılgen. Al eger Qazaqstan öz tarapynan kedendık alymdardy köteretın bolsa, ol 25%-ǧa qosymşa retınde esepteletını eskertılgen.
Tramptyŋ pıkırınşe, «būl tarifter Qazaqstan tarapynan kelgen köpjyldyq būrmalanulardy tüzetu üşın qajet» jäne ol Toqaevty osyny tüsınuge şaqyrady.
Būǧan deiın AQŞ prezidentı osyndai mazmūndaǧy hatty Malaiziia sūltanynyŋ atyna jariialaǧan bolatyn – būl elge de 25% tarif belgılendı. Qazaqstannan keiın kezek Vetnamǧa (tarif – 40%), Mianmaǧa (40%) jäne Oŋtüstık Afrika Respublikasyna (30%) keldı.
Aita keteiık, AQŞ 2025 jyldyŋ 3 säuırınde älemnıŋ 185 elıne qatysty kedendık baj salyǧyn engızgen bolatyn. Donald Tramp būl şaralardy «jauapty jäne saudadaǧy ädılettılıktı qalpyna keltıru» dep ataǧan. Sol kezde Qazaqstan önımderıne 27% tarif belgılengen edı.
