Qazaqstannyŋ Resei Federasiiasyndaǧy elşısı Däuren Abaev Groznyi qalasynyŋ maŋynda ötken Ramzan Qadyrovtyŋ 17 jastaǧy ūly Adam Qadyrovtyŋ üilenu toiyna qatysqanyn rastady, dep habarlaidy "Adyrna" ūlttyq portaly.
Abaev 28 mausym künı Ahmat Iýrt auylynda ötken saltanatty şaraǧa qatysty sūraqtarǧa jauap berdı.
«Men tek Mäskeudegı elşı ǧana emespın, bükıl Resei Federasiiasyndaǧy Qazaqstannyŋ elşısımın. Sondyqtan öŋırlerge de jiı baramyn. Qazaq pen şeşen halyqtarynyŋ arasynda tyǧyz, tarihi dostyq bailanys bar. Bız ötken ǧasyrda myŋdaǧan şeşennıŋ Qazaqstanǧa deportasiialanǧanyn ūmytqan joqpyz. Sol qiyn kezeŋde qazaq halqy şeşen halqyna qoldau bıldırdı. Bügıngı qatysuym — osy dostyqtyŋ jalǧasy», – dep tüsındırdı.
Aita keteiık, Adam Qadyrov — Şeşenstan basşysy Ramzan Qadyrovtyŋ 17 jastaǧy kenje ūly. 2023 jyly Qūrandy örtegenı üşın ūstalǧan Nikita Juraveldı tergeu izoliatorynda ūryp-soǧyp, dauǧa ılıkken bolatyn. Osy oqiǧadan keiın Reseidıŋ bırneşe aimaǧy oǧan türlı marapattar tabystaǧan.
