Tarazda erekshe rejımdegi túzeý mekemesindegi 39 sottalǵan azamat attestat aldy, dep habarlaıdy “Adyrna” ulttyq portaly.
Maýsym aıynda elimizdiń barlyq mektep bitirýshileri memlekettik emtıhan tapsyryp, qoldaryna attestat alady. Mundaı qýanyshty kún Taraz qalasyndaǵy JD-158/7 mekemesindegi jazasyn óteýshiler arasynda da saltanatty jaǵdaıda ótti. Mekeme janyndaǵy keshki mektepti támamdaǵan sottalǵandarǵa jalpy orta bilim jáne negizgi orta bilim týraly attestat tabys etildi.
Saltanatty shara barysynda keshki mekteptiń oqý isiniń meńgerýshisi Nurlan Jamashev orta mektepti bitirip, attestat alý – jazasyn óteýshiler úshin úlken ómir mektebiniń jaýapty kezeńi ekenin atap ótti.
Aıta ketsek, bilim alýshylar aýyr qylmys jasap, temir torda júrgenmen, olardyń attestattarynda bul týraly eshqandaı málimet bolmaıdy. Onyń ústine, zańǵa sáıkes jazasyn óteýshilerdiń orta bilimmen qatar, kásibı bilim alýlaryna da múmkindik bar.
“Adyrna” ulttyq portaly
