Qazaqstandyq ınformatıka pániniń muǵalimi Qýanysh Maǵaýın Swift baǵdarlamalaý tili boıynsha sertıfıkattalǵan Apple oqytýshysy atandy. Bul týraly Oqý-aǵartý mınıstrligi málimdedi, dep habarlaıdy “Adyrna” ulttyq portaly.
Nur-Sultandaǵy respýblıkalyq fızıka-matematıka mektebiniń muǵalimi Qýanysh Maǵaýın Apple kompanııasynyń kýrstarynan ótti. Emtıhandaryn sátti tapsyryp, sertıfıkat alǵan soń, ol Apple-oqytýshysy atanǵan tuńǵysh qazaqstandyq muǵalim boldy.
Endi ustaz Apple Education-niń eksklıýzıvti sharalaryna qatysa alady. Onda álemniń úzdik baǵdarlamashylary bilim salasyndaǵy jańa jobalarymen bólisedi.
"Búgingi tańda Qazaqstanda IT-salasy, onyń ishinde bilim salasynda qarqyndy damýda. Biz elektrondy oqýlyqtar, kúndelikter qoldanyp, emtıhandar men olımpıadalardy onlaın formatta ótkizetin sanaýly elderdiń qataryndamyz. Apple kýrstarynda bizge Swift baǵdarlamalaý tiliniń kómegimen mobıldi qosymshalardy jasaý negizderin úıretti. Mentorlar aǵylshyn tilinde dáris oqydy. Meniń tobymda negizinen qosymsha jasap shyǵarýda mol tájirıbesi bar IT-mamandar oqydy. Men toptaǵy jalǵyz muǵalim edim. Barlyq emtıhandardy sátti tapsyryp, Apple oqytýshysy statýsyn ıelengenim úshin baqyttymyn. Aldaǵy ýaqytta mektepte mobıldi qosymshalardy jasaý boıynsha kýrs ótkizip, alǵan tájirıbemmen áriptesterimmen bólissem degen josparym bar", – dedi Qýanysh Maǵaýın.
Aıta ketetin jaıt, Qýanysh Maǵaýınniń arqasynda Apple Authorized Training Center for Education statýsy avtomatty túrde ol qyzmet etetin mektepke de berildi.
Elordadaǵy Respýblıkalyq fızıka-matematıkalyq mektep Swift app development qosymshalaryn jasaý boıynsha kýrstar ótkizip, oqýshylardy sertıfıkattap, bilim oshaǵy qabyrǵasynda Apple classroom zerthanasyn ashýǵa quqyly.
“Adyrna” ulttyq portaly
