Búgin Aqtóbe oblysynda 517 referendým ýchaskesi jumys istep jatyr. Bul ýchaskelerde turǵyndardyń naýqanǵa qatysýy úshin jaǵdaı jasalǵan. Tipti múmkindigi shekteýli jandar úshin ınvataksıler men sýrdo aýdarmashylardyń jumys jasaýy qarastyrylǵan. Daýys berý naýqanynda jastardyń belsendiligi baıqalady. Ásirese, tańdaý jasaýǵa kelgen stýdentterdiń qarasy kóp. Sondaı-aq el bolashaǵy úshin mańyzdy sharadan qalmaýǵa tyrysqan qarııalarymyz da bar.
Zeınetker Qasymbek Ábdirahmanov Aqtóbe qalasyndaǵy #67 daýys berý ýchaskesine tańǵy saǵat 08.15-te keldi. Ol memlekettiń reformalaryn qoldaıtynyn, oń ózgeristerdiń jaqsylyqqa bastaıtynyn aıtady.
- Otbasymyzben kelip, daýys berip jatyrmyz. Prezıdenttiń bastamalary durys dep esepteımin. El ıgiligine qyzmet etip júrgen azamattarymyz, jastarymyz aman bolsyn! Qazaqstanymyz damı bersin! - deıdi ol.
Aqtóbe qalasyndaǵy #538 referendým ýchaskesine kelip daýys bergen Aıaýlym Saǵıdollaqyzy búgin, 5 maýsymda, 18 jasqa tolyp otyr. Týǵan kúninde alǵash bolyp referendýmǵa qatysyp, daýys bergen Aıaýlym elde bolyp jatqan ózgeristerdi qoldaıtynyn jetkizdi.
— Medıınalyq kolledjde oqımyn. Elimizde bolyp jatqan reformalardy qoldaımyn. Qasym-Jomart Kemelulynyń bastamasymen memleketimizde oń ózgerister, jaqsy jańalyqtar bolyp jatyr. Búgin 18 jasqa tolyp, alǵash ret referendýmǵa qatysý men úshin kútpegen jaǵdaı boldy, — deıdi ol.
Aıta ketý kerek, daýys berý ýchaskeleri keshki 20.00-ge deıin jumys isteıdi. Jalpy aqtóbelikterdiń belsendiligi de, kóńil kúıi de jaqsy.
Qoryta aıtsaq, Aqtóbe oblysy bul referendýmnan jańa, jaǵymdy ózgerister kútedi.
Danagúl Baımuqash,
"Adyrna" ulttyq portaly.
