8-qabattan qulap ketýge shaq qalǵan sábıdi qutqaryp qalǵan Sábıt Shontaqbaev pen Saǵı Jylqyshıevtiń erligi qoǵamda qyzý talqyda. Al onyń erligin taspaǵa túsirip alǵan elordalyq turǵyn óz eńbeginiń eskerýsiz qalǵanyna qapaly. Bul týraly Nege.kz tilshisi Baqyt Chetenovamen sóılesip, oqıǵanyń qalaı órbigenin óz aýzynan estigen, dep habarlaıdy “Adyrna” ulttyq portaly.
“Men qazir dekrettik demalysta otyrǵan anamyn. Sol kúni kún ystyq bolǵandyqtan terezeni ashyp qoıǵanmyn. Kenet syrttan kóp adamnyń aıqaılaǵan daýysyn estidim. Men alǵash kórgenimde, Sábıt terezege umtylyp jatyr eken. Dereý telefonyma júgirip, taspaǵa túsirdim. Sebebi, abaısyzda bala mert bolsa, Sábıttiń kinásizdigin tek vıdeomen dáleldeýge bolady dep oıladym. Abyroı bolǵanda, búldirshin aman qaldy. Vıdeony lezde, kórshilerdiń áleýmettik jelidegi paraqshasyna jiberdim. Sosyn barlyǵymyz syrtqa shyqtyq. Sút pisirim ýaqytta men túsirgen vıdeo qoǵamdyq rezonanstyń týýyna sebepker boldy. Sábıt pen Saǵıdyń úıli bolýyna sol vıdeonyń septigi tıdi dep oılaımyn”, - dedi ol.
Úsh balanyń anasy Baqyttyń aıtýynsha, Qazaqstanda erlik kórsetken batyrlardyń isi kórinbeı qalyp jatyr. Sondyqtan lezde vıdeoǵa túsirip alǵan. Alaıda Baqyt Sábıt pen Saǵıǵa renjeýli.
“Olar kóptiń qolynan kele bermeıtin naǵyz erlik istedi. Sábıt úshin de, Saǵı úshin de óte qýanyshtymyn. Sábıttiń úıli bolǵanynan habardar bolǵan soń, quttyqtaıyn dep habarlastym. Tutqasyn kótermedi. Vatsabyna habarlama jazǵan edim. Oqydy, biraq jaýap qaıtarmady. «Vıdeoǵa túsirgenińiz úshin raqmet!» dese boldy ǵoı. Maǵan eshkim alǵys aıtpady.
Tipti áleýmettik jelide kóp halyq «Osy oqıǵa vıdeoǵa túsip qalmaǵanda Saǵı men Sábıttiń erligi eleýsiz qalatyn edi» dep jazyp jatyr eken. Men de solaı oılaımyn. Sol vıdeo tipti Brıtanııa, Koreıa, AQSh sııaqty elderge de tarap ketipti. Barlyq telearna sol vıdeomen sıýjet jasady. Biraq meni avtor retinde kórsetpegen. Tek bir ǵana saıt syıaqy berip, vıdeonyń avtory retinde meniń esimimdi jazyp jarııalady”,- dep renishin bildirdi ol.
“Adyrna” ulttyq portaly
